Зөн билгийн тулаан нэвтрүүлгийн шилдэг оролцогч Д.Сарандаваа өөрийн амьдралын 20 гаруй жилээ “далд ертөнц”-ийг судлахад зориулж яваа. Тооны багш мэргэжилтэй ч авьяас чадвараа үзэгчиддээ таниулж чадсан түүнийг тойрох үйлчлүүлэгчид цөөнгүй байдаг.

Түүнчлэн зөн билэгтэн Д.Сарандаваагийн ЧД-ийн Долоон буудалд байрлах гэрийн гадна иргэд хонон өнжин оочерлодогоос үзвэл тэрээр энэ авьяас билгээрээ хэдийнээ олонд танигдаж чадсаныг илтгэнэ.

Энэ мэт байдлаараа өөрийн адил хүмүүсээс эрхгүй ялгарч чаддаг Д.Сарандаваа өчигдөрхөн “Түлхүүр” нэртэй буддын шашны сүм байгуулснаа олонд мэдэгдсэн байна.

Зөн билэгч Д.Сарандаваагийн “Түлхүүр” сүм нь билэгт сайн өдрөөр нээлтээ хийж байгаа тул эл өдөр иргэдийн хөлд дарагдсан гэнэ. Хувийн сүмтэй болсон зөн билэгтэн маань ойрын өдрүүдэд нэлээд сэтгэл хангалуун байгаагаа ч дуулгах боллоо.

“Түлхүүр” сүм нь ЧД-ийн нутаг дэвсгэрийн зүүн дэнжид оршиж байгаа тул иргэд тийшээ мөргөлийн зам татуулах болжээ.