Да. Ганболд энэ удаад нийслэлд, тэр тусмаа Сонгинохайрхан дүүрэгт “зодоглохоор” шийдсэн.

Төрсөн нутаг болох Хэнтий аймагтаа нэр дэвшээд хоёр гурван ч удаа бүдэрсэн болохоор энэ удаад халираад зүүн тийш зүглэсэнгүй бололтой. Хаширна л гэдэг энэ байх. Барууны эдийн засгийн онолын хэдэн ном уншсан энэ хүний хувьд Сэлэнгэ, Дарханы тойргийг бүр зүүдлэхийн ч хэрэггүй. Яагаад гэвэл тэргүүн шадар сайд байхдаа газар тариаланг дэмжихийн оронд устгах хэрэгтэй гэж улаан цайм ухуулж явсныг нь энэ бүс нутгийн тариаланч ард түмэн одоо хэр мартаж чаддаггүй юм билээ. Сэлэнгэ аймгийн Цагаантолгой сумын уугуул, насаараа газраа шүтэж, тариалан эрхэлж амьдарсан хөдөлмөрийн баатар М. Эрхэмбаяр 2008 онд телевизэд өгсөн ярилцлагадаа “Би газрынхаа үр шимээр өдий зэрэгтээ яваа хүн. Харамсалтай нь Да. Ганболд тэргүүн шадар байхдаа манай нутагт ирээд “Газар тариалангийн хэрэг бидэнд байхгүй. Гаднаас үр тариа авна. Энд байгаа услалтын системээ төмрийн үйлдвэрт өгвөл таарна” гэж хэлдэг байгаа. Ёстой аянга буух шиг л болсон. Хамгийн харамсалтай нь түүний хэлснээр газар тариаланг устгах ажил хурдан эхэлсэн дээ. Социализмын үед 90 сая рублиэр авсан Монголдоо ганцхан аварга услалтын систем манай суманд байлаа шүү дээ. Түүнийг маань ухаад төмрийн үйлдвэрт тушаачихсан юм. Харин Атрын гуравдугаар аяны чимээ сонсогдож, Засгийн газраас газар тариаланг сэргээн хөгжүүлэх бодлого боловсруулсныг сонсоод миний сэтгэл сэргэж, залуу цагийн эрч хүч орох шиг болсон” гэж ярьсныг олон хүн тийм амархан мартахгүй болов уу. Өмч хувьчлал нэрээр үндэсний үйлдвэрүүдийг үнсэн товрог болгосон, үр тариаг үзэн яддаг Да. Ганболд мэтийн хүмүүст хаана ч нэр дэвшсэн “хар тамга” даруулчих гээд хэцүү л байдаг байх.

bolod.mn