-ӨМНӨ НЬ УКРАЙНЫ ГУРВАН ИРГЭНИЙГ БАРИВЧИЛСАН БИЛЭЭ- Украйн улсын гурван иргэн олон улсын хуурамч карт ашиглан бэлэн мөнгөний машинаас их хэмжээний мөнгө хулгайлсан талаар манай сонин мэдээлсэн билээ. Тухайлбал, өнгөрсөн сарын 18-нд жуулчны визтэй ирсэн Дандович Сергей, Кавчинко Юрий нар “ХААН” банкны бэлэн мөнгөний машинаас 13 ширхэг хуурамч картаар 100 гаруй сая төгрөг хулгайлсан. Тэд хулгайлсан мөнгөө 46 мянган евро болгочихоод нутаг буцах гэж байхад нь өнгөрсөн 22-ны шөнө баривчилсан билээ. Тэдний дараа Монголд ирээд сар гаруй болж буй Украины иргэн Г.Н.Райтмановичийг Сүхбаатар дүүргийн цагдаагийн хэлтсээс баривчилсан. Тэрбээр баригдах үедээ олон улсын 90 шахам хуурамч карттай байсан бөгөөд таван мянган ам.доллар, гурван сая төгрөгтэй байсан аж. Хуулийнхан Г.Н.Райтмановичийг Монголд сар гаруй амьдрахдаа бэлэн мөнгөний машинаас хулгай хийж болох эсэхийг судлаад нутаг нэгтнүүдээ дуудсан гэж сэжиглэн байгаа аж. Мөн 23-33 насны тэдгээр залуусын олон улсын банкны хуурамч карт үйлдэж, улс дамжин хулгай хийдэг бүлэглэлийн гишүүд байж болзошгүй гэж шалгаж эхэлжээ. Сэжигтнүүд олон улсын хуурамч картыг өөрсдөө хийгээгүй гэж мэдүүлж байгаа гэнэ. Ийм төрлийн гэмт хэрэг үйлддэг бүлэглэлд сүлжээний хакерууд ажилладаг. Хакерууд олон улсын карт гаргагч банкны дотоод сүлжээнд нэвтэрч картын чипийг нь хулгайлдаг аж. Ингээд хулгайлсан чипээ суулгаж хуурамч карт үйлддэг. Үүнийг бүлэглэлийн бусад гишүүд нь авч жуулчлах маягаар олон улсад явж хулгай хийдэг аж. Манай улсын хувьд өмнө нь гадаадын иргэд хуурамч зээлийн картаар томоохон дэлгүүрүүдээр үйлчлүүлсэн хэрэг гарч байсан. Харин энэ удаад бэлэн мөнгөний машинаас их хэмжээний мөнгө хулгайлж байсан бүлэг этгээдүүдийг гурав нь зочид буудлаасаа баригдсан. Дөрөв дэх этгээдийг Эрүүгийн цагдаагийн газраас эрэн сурвалжилж байна. Тэрбээр өнгөрсөн сарын 20-24-ны өдрүүдэд зарим арилжааны банкны бэлэн мөнгөний машинаас хуурамч карт 18 удаагийн үйлдлээр их хэмжээний мөнгө хулгайлсан байна. Сэжигтний зураг АТМ-ыи машины камерт бичигдэн үлдсэн ба түүнийг Эрүүгийн цагдаагийн газрын гуравдугаар хэлтсээс эрэн сурвалжилж байна. Уг этгээдийг таних болон харсан хүн байвал Эрүүгийн цагдаагийн газарт мэдэгдэх боломжтой аж. Ц.ӨРНӨХ Энэ МЭДЭЭ танд таалагдаж байвал Like хийгээрэй. Танд баярлалаа.