Талийгаач энэ сандал дээр найман цаг суусан ч тусламж авч чадсангүй

-ХҮЛЭЭН АВАХЫН ЭМЧ НАР ТАЛИЙГААЧИД ДАРАЛТ БУУРУУЛАХ ЭМ ӨГӨӨД ЯВУУЛЖЭЭ. ТҮҮНЭЭС ХОЙШ ТАЛИЙГААЧ ЭМНЭЛГИЙН ХОНГИЛД НАЙМАН ЦАГ СУУГААД АМИА АЛДЖЭЭ-

Сонгинохайрхан дүүргийн эрүүл мэндийн нэгдлийн хонгилд хагас өдөр суусан иргэн амиа алджээ. Тодруулбал, өнгөрсөн баасан гаригийн үүр цайх үеэс өдрийн 13.30 цаг хүртэл эмнэлгийн хонгилд сууж байсан иргэний бие гэнэт муудаж, тусламж авч чадалгүй хорвоог орхижээ. Тэнд байсан хүмүүсийн яриагаар талийгаач “Туслаач, авраач. Намайг эмчлээд өгөөч” гэж орилж байсан ч эмч нар тоохгүй байсан гэнэ. Талийгаач орилж, эмч нараас тусламж хүсч байгаад гэнэт царай нь цайж үхэдхийн унасан аж. Эмнэлгийн хонгилд олны нүдэн дээр тусламж хүсч байсан иргэнээ эмч нар тоосонгүй юү. Эсвэл талийгаач эмч нарын нүдэнд өртөж, тусламжийг нь хүртэхээргүй эрүүл байж байгаад гэнэт амьсгал хураав уу. Энэ талаар бид сурвалжиллаа.

ТҮРГЭН ТУСЛАМЖААР ИРЭХЭД НЬ ЭМЧ ЭМ ӨГӨӨД УНТУУЛЖЭЭ

Өнгөрсөн пүрэв гаригийн шөнө Б.Пүрэвдорж (Талийгаач)-ийг гудамжинд согтуу байхад нь эргүүлийн цагдаа таарч, түргэн тусламж дууджээ. Түргэн тусламж түүнийг Сонгинохайрхан эрүүл мэндийн нэгдэлд шөнийн 00.35 цагт авчирч өгчээ. Тухайн үед жижүүр эмчээр мэдрэлийн их эмч Ш.Цэцэгмаа ажиллаж байжээ. Ш.Цэцэгмаа эмчтэй хамт ажиллаж байсан эмч өвчтөнг үзэхэд даралт нь хэвийн байсан гэнэ. Тухайн үед түргэн тусламжийн эмч Б.Пүрэвдоржид тайвшруулах тариа тарьчихсан байсан учраас хүлээн авах өрөөнд унтуулжээ. Унтахынх нь өмнө эм өгсөн аж. Ингээд баасан гаригийн үүрийн 04.00 цагт өвчтөн сэрэхэд нь эмчилгээ хийх шаардлагагүй гээд явуулжээ. Гэтэл 05.30 цагийн үед сувилагч эмнэлгийн гадна талыг цэвэрлэхээр гарахад нь өнөөх өвчтөн гадна нь сууж байжээ. Тухайн үед тэр хавиар эргүүлийн хоёр цагдаа явж таарч. Ингээд сувилагч, эргүүлийн хоёр цагдаатай түүнийг эмнэлгийн хонгилд оруулж суулгажээ. Талийгаач ч “Хэсэг сууж байгаад гарна” гээд үлдсэн аж. Түүнээс хойш түүнийг хэн ч анзаарсангүй. Өвчтөн суусаар 13.30 цагийн орчимд гэнэт ухаан алдаж арван минутын дараа амьсгал хураажээ. Тухайн үед группт орохоор хүлээж байсан иргэд талийгаачийг багагүй хугацаанд зовиурлаж, эмч нараас тусламж хүссэн гэдгийг хэлсэн. Харин эмнэлгийн ажилтнууд түүнийг өвдөж байна гэж огт хэлээгүй, ганхийх дуу гаргаагүй гэцгээж байсан. Баасан гаригт эмнэлгийн зарим удирдлага нь эзгүй байсан талаар ч эх сурвалж хэлсэн.

Талийгаач 37 настай. Ойрын хамаатан нь нас барсан учраас сүүлийн хэд хоног гуниглаж явсан. Гунигаа тайлах гэж архи ууж байсан талаар нь ойрынхон нь ярьсан. Ар гэрийнхэн нь талийгаачийг өвчтэй байхад нь эмч нар тусламж үзүүлээгүй гэж гомдолтой байгаа аж. Гэхдээ талийгаачийн 49 хоногийг өнгөрөөтөл хэл ам хийхгүй, энэ талаар ярихгүй байхаар шийджээ. Энэ хэргийг Эрүүгийн цагдаагийн газар, Сонгинохайрхан дүүргийн цагдаагийн хэлтэс шалгаж байгаа аж. Хохирогчийн цогцсыг шинжлүүлэхээр шүүх эмнэлэгт шилжүүлсэн. Шүүх эмнэлгийн дүгнэлт гарахаар талийгаач ямар шалтгаанаар амиа алдсан, эмч нар ямар эмч тариагаар үйлчилсэн нь тодорхой болох аж.

ЭМНЭЛЭГТ СУУГААГААРАА НАС БАРСАН НЬ БИДЭНД Ч ХАРАМСАЛТАЙ БАЙНА

Эмч нар талийгаачид ямар тусламж үзүүлсэн, хэрхэн хандсан талаар Сонгинохайрхан эрүүл мэндийн нэгдлийн Эмчилгээ эрхэлсэн орлогч дарга Г.Гэрэлт-Одоос тодрууллаа.

-Түргэн тусламжийн эмч хүргэж ирснээс хойш яг ямар эмчилгээ хийсэн юм бэ. Эм  өгөөд л унтуулчихсан гэх юм.

-Даралт буулгах эм уулгасан байна лээ.

-Өвчтөн ямар оноштой ирсэн юм бэ?

-Архины хордлоготой байсан гэсэн.

-Архинд хордсон гэж байгаа бол хордлого тайлах эмчилгээ хийдэг юм биш үү?

-Шингэн хийгээгүй. Талийгаач хүлээн авах өрөөнд унтаж байхдаа гурван удаа ус нэхэж уусан гэсэн. Мөн хоёр удаа боссон байна. “Хүн байна уу” гэх зэргээр хашгирч байсныг бодоход согтуу байсан нь илт байгаа.

-Тэр шөнө танай эмнэлэг хэрэг ачаалалтай байсан бэ?

-Нэг хүн архинд хордчихсон бие нь маш хүнд байсан. 103-аар нийтдээ ес, өөрөө ирсэн хоёр хүн хүлээн авахад байсан. Мөн архины гүн хордлоготой хүнд сэхээн амьдруулах эмчилгээ хийж байлаа. Ер нь эрчимт эмчилгээний тасагт тэр шөнө маш их ачаалалтай байсан.

-Танай эмнэлэгт нэг хүн хагас өдөр сууж байхад хэн ч анзаараагүй гэдэг нь сонин байна. Ямар шалтгаанаар суугаад байгааг нь ядаж асуугаагүй гэж үү?

-Сандал дээр сууж байхад нь хэд хэдэн эмч нар “Та юун хүн бэ. Яагаад суугаад байна вэ” гэж асуусан гэсэн. Тэгэхэд бие өвдөж байна, эмнэлгийн тусламж хүсч байна гэж огт хэлээгүй гэсэн. Үүдний жижүүрт хүртэл “Би жаахан унтаж байгаад явъя” гэснээс өөр юу ч хэлээгүй. Тухайн үед эмч нарын зөвлөгөөний хурал болж байсан. Эмнэлгийн хонгилд группт орох гэж байсан хүмүүс байсан.

-Тэгээд өвчтөн эмнэлэгт тодорхой хугацаагаар унтсан гэсэн. Үүрээр архи нь гараагүй, согтуу гараад явсан хэрэг үү?

-Тэрийг сайн мэдэхгүй байна. Бага зэргийн согтолттой байсан гэдгийг жижүүрүүд хэлж байгаа. Ер нь архи уудаг хүн юм болов уу гэсэн бодолтой байгаа. Хүлээн авахад байхад нь ирсэн цагдаа “Манайд бүртгэлтэй хүн байна” гэж хэлсэн байдаг.

-Эмнэлэгт байхад нь ар гэрийнхнийг нь дуудаад хүлээлгээд өгч болоогүй юм уу. Халамцуу байгааг нь мэдсээр байж явуулж болдог юм уу?

-Хүлээн авах тасгийнхан ар гэрийнхэнд нь хэл өгөөгүй. Ар гэрийнхнийх нь утас байгаагүй. Харин гэрийн хаяг нь байсан гэсэн. Өглөөгүүр “явлаа” гээд гарахад нь “явчихсан л” гэж бодож. Гэтэл өнөөх хүн нь эмнэлгийн хонгилд суугаад байж. Хүлээн авахад байсан бол ар гэрийнхэнд нь хэл хүргэх байсан байх.

-Түргэн тусламжийн эмч эмнэлэгт авчраад байхад эмчилгээ хийх шаардлагагүй байсан гэж үү?

-Жижүүр эмч эмчилгээ хийх шаардлагагүй гэсэн шийдвэр гаргасан. Энэ шийдвэр нь буруу байсныг үгүйсгэхгүй.

-Талийгаач тусламж эрээд байхад нь эмнэлгийнхэн “Чи согтуу байна. Архиа гаргачихаад ир” гээд тоохгүй байсан талаар хүмүүс ярьж байна. Эмч нар тийм хандлага үзүүлээгүй гэж үү?

-Эмч нар тэгж хандсан гэж ойлгохгүй байна. Баасан гаригийн өглөөний 8.00 цагаас эмч нар кабинетдээ орчихоод цагийн хуваариар үзлэг хийж байсан. Эмч нарыг ажилдаа ирэхэд нь талийгаач зам дээр нь сууж байсан нь үнэн. Харин жижүүр бүхэл өдөржин үүдний хонгилд байдаг. Жижүүрт “Би жаахан сууж байгаад явна” л гэж хэлсэн гэдэг.

-Үүдний жижүүр, цахим үйлчилгээний ажилтнууд чинь тодорхой хугацаанд эмнэлэгт ажилласан, анхан шатны мэдлэгтэй хүмүүс байж таараа. Нүдэн дээр нь сууж байсан хүний царайг анзаараагүй гэж үү. Ядаж бие нь тавгүйрхээд, царай нь хувираад байхад нь эмч дуудаад үзүүлчихэж болоогүй юм болов уу?

-Үүнийг бид ч ярьж байна. Жижүүрээс огт тусламж хүсээгүй гээд байгаа юм.

-Та тэр хүнтэй таарсан уу?

-Би тэр өдөр хувийн ажилтай байсан учраас чөлөөтэй байсан. Талийгаачийг өнгөрсний дараа 15.00 цагт эмнэлэгтээ ирсэн.

-Талийгаач шоконд орж амиа алдсан юм биш биз?

-Шок бол байгаагүй. Шокгүй учраас өөрөө эмнэлгээс гараад явсан. Өглөө нэг эмч орж ирэхэд хөлөө жийчихсэн сууж байсан гэсэн. Хөлөө ав гэхээр урдаас нь үг сөрөөд байсан гэж байгаа.

-Эмнэлгийн хонгилд сууж байгаад тусламж авч чадалгүй нас барсан гэхээр ар гэрийнхэнд нь харамсалтай байна. Ядаж ганц тариа хийчихгүй дээ гэж гомдож байна лээ.

-Тэр ойлгомжтой. Эмнэлэгт сууж байгаад суугаагаараа нас барсан нь бидэнд ч харамсалтай байна.

-Ар гэрийнхэнтэй нь уулзсан уу?

-Өнөөдөр уулзсан. Бид болсон явдлыг танилцуулсан. Цаашид ямар харилцаа үүсэхийг мэдэхгүй байна.

-Архинд хордож ирсэн хүнд эрүүл мэндийн нэгдэл тусламж үзүүлэх ёстой юу. Эсвэл албадан эмчилгээнд явуулдаг юм уу?

-Манайх эмчилдэг. Ер нь сүүлийн үед архинд хордож ирэгсдийн тоо өсч байгаа. Он гарсаар л гэхэд нэг сая гаруй төгрөгийн эмчилгээ хийчихээд байна.

Б.ЦЭЦЭГДЭЛГЭР Гэрэл зургыг Б.МӨНХ-ЭРДЭНЭ

“ӨДРИЙН СОНИН”