Дорнод аймгийн Баяндун сумын нутагт гарсан хээрийн түймрийг унтраахаар ажиллаж байсан Онцгой байдлын гурван албан хаагч амь эрсэдсэн харамсалтай хэрэг гарсан билээ. Амиа алдсан гурван аврагчидтай хамт ажиллаж байсан Г.Багабиш, Б.Болорсүх нар 75-90 хувийн түлэгдэлттэй биеийн байдал нь хүнд байгаа талаар мэдээлж байсан. Тэднийг “МИ-8” нисдэг тэргээр нийслэлд авчран ГССҮТ-д эмчилж байсан боловч Г.Багабиш өчигдөр өглөө нас баржээ. Тэрбээр Онцгой байдлын салбарт 23 жил ажилласан, хашир туршлагатай албан хаагч бөгөөд салхины эрч өөрчлөгдөж, гал нөмрөх үед хамт ажиллаж байсан дэд ахлагч А.Болорсүхийг өөрийнхөө доор хийж хамгаалж амийг нь аварсан ачтан юм. Харин одоо эмчлүүлж буй дэд ахлагч, 24 настай А.Болорсүх нь Онцгой байдлын салбарт дөрвөн жил ажилласан бөгөөд түүний дөрвөн мөч, нүүр нь түлэгджээ.

Х.ЦЭНД-АЮУШ