UUSA нэртэй барилгын компанийн барьсан 72 айлын орон сууц жил гаруйн хугацаанд оршин суугчдын хэл амыг

таталж байгаа аж. Чингэлтэй дүүргийн 3-р хорооны нутаг дэвсгэр, Төмөрчний гудамжны 22-р байр хэмээх тус байрыг бариулсан дээрх UUSA барилгын компани нь Даян аварга Г.Өсөхбаярынх аж. Тэрбээр сантехник болон бүх зүйл нь чанаргүй материалаар хийгдсэн энэхүү барилгынхаа хариуцлагыг өөрөөсөө холдуулдаг агаад оршин суугчдыг гомдол гаргахад “Байрнаасаа гар” гэх мэтээр ам хэлээр доромжилдог тухай тус байрны оршин суугчид мэдээлж байна. Г.Өсөхбаяр аваргаас гадна монголчуудын хайрлан хүндэлж явдаг нэр нөлөө бүхий бөхчүүд энэ барилгын цаана байдаг байна. 72 айлын гэх энэхүү орон сууц анх оршин суугчдаас захиалга авахдаа кабелийн сувагтай, интернэттэй, хүүхдийн иж бүрэн тоглоомын талбайтай, хөгшчүүлийн нарлах тусгай суудалтай, домофон системтэй, 24 цагийн лифттэй гээд хүний амьдралд бүрдүүлж болох бүхий л тухлаг орчныг бүрдүүлсэн талаар рекламдаж байсан гэнэ. Харин нэдэр дээрээ амласан бүхний 50 хүрэхгүй хувь нь л оршин суугчдыг угтсан аж. Монголчууд хүлцэнгүй үедээ хүлцэнгүй хүмүүс хойно аваргуудыг харж догдлон тэр үедээ байрандаа хэл амгүйхэн нүүгээд оржээ.

Гэтэл өдгөө ашиглалтад ороод хоёр жил гаруй болж байгаа хэр нь лифт нь ажиллагаагүй болж, долоогоос дээш давхрын айлууд нь халуун, хүйтэн ус байнга тасардаг, улаан зэв гоождогоос гадна хана, тааз нь цууралт өгөөд эхэлчихсэн юм байна. Мөн зориулалтын хогийн цэг байхгүй нь оршин суугчид ямар ч халдварт өвчнөөр өвчилж болзошгүй байгааг хэлж байна. Хамгийн гол нь Даян аварга Г.Өсөхбаяр, Аварга Д.Сумъяабазар, Улсын начин н.Амарсайхан нарын олны хайр хүндлэлийг хүлээсэн бөхчүүдээр овоглосон шаардлага хангахгүй энэ орон сууц үнэндээ байнга асуудалтай байдаг агаад оршин суугчид нь нийлж ярилцаад “Ард олны хайртай бөхчүүдийнхээ нэр хүндэд халдсан мэдээллийг олон нийтэд цацаад яахав. Асуудлыг аль болохоор эв зүйгээр шийдъе” хэмээн ярилцжээ. Гэсэн хэдий ч хүндэт бөхчүүд энэ асуудлыг нь хүлээж авах нь бүү хэл нохой хуцсан чинээ тоогоогүй гэнэ. Ингээд цөхөрсөн иргэд холбогдох газарт нь гомдол гаргахад хариуцах эзэнгүйн улмаас энэ хэрэг нуун дарагдаж, Авлигатай тэмцэх газар, Нийслэлийн мэргэжлийн хяналтын газар бөхчүүдийн талд илт үйлчилсэн байна. Өдгөө хотын төвд шинэ орон сууцанд амьдардаг нэртэй ч наад захын шаардлага хангаагүй, усгүй, лифтгүй энэ байрыг эхнээсээ  хүлээж авсан комисс ч мөн асуудалтай болж таарах нь энэ хэргийн цаанаас цухалзаж байна.

Зүлэг ногоон дэвжээнээ олныхоо магнайг тэнийлгэн барилддаг, бидний хүндлэлийн нэг хэсэг болсон хүмүүс ийнхүү ашиг сонирхлын төлөө иргэдийг зольж, доромжилж, хуулийг гууль болгож, хяналтыг зогсоож чаддаг гэдгээ ЧД-ийн 3-р хорооны 22-р байрныханд харуулаад байгаа аж. Өмнө нь тус байрныхан нэг удаа телевиз дуудан гомдоллож байсан байна. Харин одооноос бүх шатны байгууллагаар тэмцэл хийхээ илэрхийллээ.
Ж.Насаа wikimon.