-“НОЛГО” КОМПАНИЙН ЗАХИРАЛ АРИУН ЦЭВРИЙН ӨРӨӨНДӨӨ ЕСӨН АЛТАН ГУЛДМАЙ, 160 МЯНГАН АМ.ДОЛЛАР НУУСАН БАЙЖЭЭ-

Түлш, эрчим хүчний салбарт үйл ажиллагаа явуулдаг “Нолго” компанийн захирал П.Батдаваа биллярдны өрөөнийхөө арын ариун цэврийн өрөөнд 160 мянган ам.доллар, нэг бүр нь 15 грамм жинтэй есөн ширхэг алтан гулдмайг хадгалж байжээ. Алтан гулдмайнууд нь 7.6 сая төгрөгийн үнэтэй аж.

Үнэт эдлэл, хөрөнгөө нуусан өрөөнийх нь 00-ын бочки нь эвдэрсэн учраас гагнуурчин, сантехникчээр ажиллаж байсан Д.Наранцогтыг дуудаж засуулахаар болсон байна. Гэтэл Д.Наранцогт захирлынхаа нуусан эд зүйлийг олж хулгайлжээ. Баянзүрх дүүргийн шүүх уг хэргийг хэлэлцээд захирлынхаа өрөөнөөс их хэмжээний үнэт зүйл, мөнгө хулгайлсан Д.Наранцогтод арван жил зургаан сар хорих ял оноожээ.

Болсон явдлыг тоймлон хүргэе.

Шүүгдэгч Д.Наранцогт мэдүүлэхдээ “Би тэр компанид 2000 оноос гагнуурчнаар ажиллаж байгаа. 2011 оны хоёрдугаар сарын эхээр цагаан сарын баярын дараахан ажил дээрээ байж байтал захирал “Биллярдны өрөөний 00-ийн бочкиг зас” гэж дуудсан. 00-ийн өрөөнд байхад захирал орж гараад байсан. Тэр өрөөний агааржуулагчийн хоолойн дотор хоёр ширхэг төмөр хайрцаг байсан. Хайрцгийг үзтэл дотор нь дан 100-тын дэвсгэрт бүхий зургаан боодол ам.доллар байсан. Мөн даавуунд боосон алт байсан. Нөгөө саванд нь долоон боодол ам.доллар байсан. Тэднийг авч өвөртөө хийчихээд бочки засч байтал захирал орж ирээд “Дуусахгүй бол маргааш бол доо” гэж хэлээд намайг гаргаад хаалга түгжсэн” гэжээ.

Д.Наранцогт захирлынхаа өрөөнөөс нуусан мөнгөөрөө 14 мянган ам.доллараар машин авчээ. Мөн хадам дүүдээ 6.8 сая төгрөгеөр машин авч өгсөн байна. Улмаар ажлаасаа гарч Баянгол дүүрэгт байр авах зэргээр мөнгийг нь үрсэн байна.

Хохирогч П.Батдаваа “Энэ нөхөр хулгай хийсний дараа арав хоног чөлөө аваад ажилдаа ирээгүй. Хэд хоногийн дараа цагдаад мэдэгдсэний дагуу баригдсан. Тэр өрөөнд надаас өөр хүн ордоггүй юм. Хоёр хайрцагт өсөн ширхэг алтан гулдмай, 160 мянган ам.доллар байсан. 15 граммын 999 сорьцтой алт байсан юм” гэж мэдүүлжээ.

Д.Наранцогтоос 43 сая төгрөгийг гаргуулж хохирогчид өгчээ. Мөн худалдаж авсан байр, хоёр машин зэрэг 156 сая төгрөгийн эд зүйлийг битүүмжилсэн байна. Харин алтан гулдмайнуудыг нь шүүгдэгч үрж цууссан гэж мэдүүлжээ.

Шүүгдэгч Д.Наранцогт нь Сэлэнгэ аймгийн Сүхбаатар хотод төржээ. 37 настай тэрбээр эхнэр хоёр хүүхэд, ээжтэйгээ амьдардаг байсан аж.

Ц.ӨРНӨХ