Гавьяат жүжигчин, дуучин С.Жавхлан БНХАУ-д зочилж, өмнөд хөршийнхөнд ая дуугаа өргөж явахдаа үндсэрхэг үзлээ илэрхийлж, эх орон, газар шорооныхоо талаар ярьсан нь тус улсын эрх мэдэлтнүүдийн эгдүүцлийг төрүүлж, дуучныг дахин хилээрээ нэвтрүүлэхийг хориглон паспорт дээр нь хар тамга дарсан гэх яриа гарчээ. Энэ талаар тодруулахаар өчигдөр 14.00 цагт түүнтэй холбогдлоо.

-Сайн байна уу. Уран бүтээлийн олз омог их үү?

-Уран бүтээл сайн байгаа. Би нутагтаа явж байна.

-Ямар ажлаар нутгийн зүг жолоо залав?

-Увс аймгийн Бөхмөрөн сум бол миний тоглож өссөн нутаг. Нутаг усыг минь гадаадынхан ухан сэндийлж, өвөлжөө бууцыг минь үгүй хийж байхад монгол хүн, тэр дундаа энэ нутаг усанд төрж, өссөн хүн зүгээр сууж болно гэж үү. Тэгээд л ирлээ. Энэ асуудал цэгцрэхээс нааш би эндээс явахгүй. Ганц дайчин ганцаардахгүй гэж, хийж чадах бүхнээ л хийнэ дээ.

-Увс аймагт сонгуулийн уур амьсгал орчихсон байна уу?

-Сонгогдоод юу ч хийгээгүй байж нам, нам гэж гүйсэн хүн олон л байх шиг байна.

-Нэг зүйлийг тодруулах гэж тан руу залгасан юм. Та урд хөршид тоглолтоо хийхдээ тайзан дээрээс ямар үг хэлчихсэн юм бэ?

-Хоёр жилийн өмнө очиж ая дуугаа өргөсөн. Тэгэхдээ “Монголын газар шороо, гал голомт ариун дагшин байж, үүрд мандан бадрах болтугай” л гэж хэлсэн.

– Таныг энэ үгнээсээ болж өмнөд хөршийг зорих эрхээ хасуулж, хар тамга даруулсан гэх юм. Энэ үнэн үү?

-Энэ талаар надад мэдэгдсэн юм байхгүй. Би хоёр жилийн өмнө БНХАУ руу явсан. Түүнээс хойш дахиж тийшээ зүглээгүй. Явах шаардлага ч байхгүй.

-Өө тийм үү. Танд амжилт хүсье. Сайн яваад ирээрэй.

-Гялайлаа.

Л.МӨНХЧИМЭГ