“Камертон” хамтлагийн ахлагч, дуучин, продюссер Д.Болд хамтлагийнхаа шинэ үеийг төрүүлэхийн тулд реалити шоу зохион байгуулаад завгүй байгаа. Үүний сацуу шинэ цомгийн ажилтай байгаа гэнэ. Тэрбээр өнгөрсөн онд Төрийн ордонд тоглолтоо зохион байгуулснаар монгол поп урсгал ийм байх ёстой гэж бараг л тодорхойлчихсон. Баргийн аавын хүү Төрийн ордонд тоглолт зохион байгуулахгүй.

Д.Болд саяхан Ерөнхийлөгч Ц.Элбэгдоржийн Герман дахь айлчлалын бүрэлдэхүүнд багтаж явсан нь нэг талаар улс орныхоо соёл урлагийг сурталчлах, элэг нэгт монголчууддаа уран бүтээлээ танилцуулах зорилготой байсан. Үүнийгээ ч “Твиттер” дэх блогтоо бичсэн байна. Ерөнхийлөгч Ц.Элбэгдорж, дуучин Д.Болд хоёр хэзээнээсээ түншийн харилцаатай.  Нэг нь улс төрийн “од”, нөгөө нь урлагийн “од” учраас магадгүй тэд хамтран улс төрд хос морь шиг давхихыг үгүйсгэх аргагүй юм.