Цаадаагийн хурандаа Ш.Батсүх долдугаар сарын 1-ний үймээний хэрэг явдлыг нэг бүрчлэн тэмдэглэсэн цагдаагийн нэрийг хэвлэлээр нийтэд зарлажээ. Уг нь энэ нэрийг УИХ-ын гишүүн Х.Тэмүүжин ихэд нууцалж байсан юм. Тэрээр уг тэмдэглэл бөгөөд тэмдэглэлийг бичсэн цагдаа нь хэргийг илрүүлэхэд чухал нөлөө үзүүлнэ хэмээн үзэж байсан юм. Тиймээс УИХ-ын гишүүн X. Тэмүүжингээс дараахь тодруулгыг авлаа.

-Танаас тодруулга авах гэсэн юм?

-Ямар асуудлаар вэ?

-Долдугаар сарын 1-ний үймээний үеэр тэмдэглэл хөтөлсөн цагдаагийн нэр болон хаана, ямар ажил хийж байгааг нь Ш.Батсүх хурандаа хэвлэлээр зарласан байна. Үүнийг та мэдсэн үү?

-Энэ талаар ярих арай болоогүй байна.

-Цагдаагийн нэрийг хэлбэл түүнд элдвийн дарамт ирнэ гэж та уг нь нэлээд болгоомжилж байсан шүү дээ?

-Ш.Батсүх нэрийг нь хэлдэг нь нэг ёсондоо дарамталж байгаа хэрэг.

-Хэргийг илрүүлээгүй байхад гэрчийн нэрийг зарлах нь түүнд аюултай биш үү?

-Ш.Батсүх өөрөө л аюул учруулах хүн нь.

-Ш.Батсүх хурандаа хэлэхдээ тэмдэглэл хөтөлсөн цагдаа Төмөрхуяг нь тухайн үед үүргээ биелүүлэлгүй, нөхдөөсөө сугарч үлдсэн гэж ярьсан байсан?

-Тухайн үед цагдаа нарт галт зэвсэг тарааж, буудах тушаал өгөхөд нь Төмөрхуяг буудаагүй юм билээ. Үүнийг л тушаал биелүүлээгүй хэмээн үзээд байгаа юм байлгүй.

-Таныг сугарч үлдсэн хүний бичсэн зохиолоор тоглож байна. Манай цагдаа нар Х.Тэмүүжингийн яриаг сонсоод инээдэг гэсэн байна лээ?

-Би Ш.Батсүх мэтийн жижиг гаруудтай юм яримааргүй байна.

-Тэгээд та хэзээ энэ тухай ярих юм бэ?

-Ц.Мөнх-Оргил нь яриг л дээ. Түүний дараа л ярья. Бас удахгүй болох шүүх бүх асуудлыг цэгцлээд өгөх биз дээ.

Т.ГЭРЭЛ