Хугацаа наашлуулж хуралдсан УИХ-ын чуулганы нэгдсэн хуралдаан өнөөдөр Монгол Улсын 30 дахь Ерөнхий сайдаар У.Хүрэлсүхийг батламжлалаа.

УИХ-ын хуралдааны өмнө МАН-ын бүлэг хуралдсан. Харин нэгдсэн хуралдаанд тус бүлгийн 32 гишүүн оролцсонгүй. Өөрөөр хэлбэл Ж.Эрдэнэбатын Засгийн газрыг огцруулахын эсрэг байр суурьтай байсан гишүүд чуулганы танхимын гадна үлджээ. МАН-ын хувьд Ерөнхий сайдаа батламжлах асуудал дээр анх удаа ингэж хоёр хуваагдлаа. Анхнаасаа У.Хүрэлсүхийн талд явсан 33 гишүүн дээр нэмэх нь АН-ын 8 гишүүн болон О.Баасанхүү нар хурлын ирцийг бүрдүүлж Ерөнхий сайдыг 100 хувийн саналаар батламжлав. УИХ-ын АН-ын бүлгийн гишүүн  Я.Санжмятавын хэлсэнчлэн  Ерөнхий сайд “Та одоо бол цөөнх байгаа шүү. АН-тай хамтарч олонхи болж байж Ерөнхий сайдаар сонгогдлоо.” гэдгийг сануулсан. Энэ үгийн цаана том агуулга явж байгаа байх.

Ерөнхий сайдыг батламжлах асуудлаар МАН-ын гишүүд ингэж хоёр хуваагдсан нь тус нам дотроо хэл үгээ ололцож чадаагүйг гэрчиллээ. Чуулганы хуралдааны дараа УИХ-ын гишүүн Ө.Энхтүвшин хэвлэлийнхэнд мэдээлэл хийхдээ ч  үүнийг нуусангүй. Энэ талаархи асуултад тэрбээр “Яаж эв нэгдлийг хангах юм гэдэг асуудлыг л тавьж байгаа. 31 гишүүн өөр газар хуралдаад л, 32 тусдаа хуралдаад  байгааг нэгтгэж, 65-уулаа хуралддаг баймаар байна. Бид бол ойлголцоё л гээд байгаа” гэсэн үгээр хариулсан.

Гэхдээ үүнийг нам талцсан гэхээсээ илүүтэй эв нэгдлээ хангаж, зөвшилцөж чадахгүй байгаа гэж ойлгох нь  үнэнд ойр байх.  Хэвлэлийнхний 33-ын гэж нэрлэсэн бүлгийн төлөөлөгчийн нэг УИХ-ын Ц.Гарамжав энэ талаар “Энд талцсан зүйл байхгүй, өглөө бүлэг бүгдээрээ хамтарч хуралдаж байгаад чуулганы цаг болсон тул  хурлаа түр завсарласан. Удахгүй үргэлжлүүлэн хуралдана” хэмээсэн юм.  Харин УИХ-ын гишүүн Н.Номтойбаяр ”Энэ парламентад сөрөг хүчин цөөнх гэж байхгүй юм байна. Өнөөдөр чуулганд АН-ын 8 гишүүн нийлж Ерөнхий сайдыг томиллоо. Албан ёсны сөрөг хүчингүй болж. Уг нь парламентийн засаглалтай оронд сөрөг хүчин заавал байх ёстой. Тэгэж байж олонх болсон хүмүүсийн шийдвэрт хяналт тавьж, зөв шийдвэр гаргуулах ёстой. Гэтэл сөрөг хүчин алга байна” гэж хэлсэн нь шууд утгаараа шинэ Засгийн газар АН буюу сөрөг хүчиндээ барьцаалагдлаа гэсэн санааг илэрхийлэв.

Өнөөдөр Ж.Эрдэнэбат шинээр сонгогдсон Ерөнхий сайдад Засгийн газрын тамгыг гардуулж өгөхдөө У.Хүрэлсүхэд баяр хүргэж, ажлын амжилт хүслээ. Дараа нь Ерөнхийлөгч Х.Баттулга төрийн ёслол хүндэтгэлийн өргөөнд мөн хүлээн авч уулзлаа.  Үүний дараа УИХ-ын дарга М.Энхболд  Ерөнхий сайд У.Хүрэлсүхийг хүлээн авч мөнгөн аягатай сүү, алд цэнхэр  хадаг барин хүндэтгэв.  Монгол төрийн жудаг, төр төмбөгөр байхын жишээ энэ.

Өнөөдрийн хуралдаанд монголын парламентын түүхэнд анх удаа амь настай холбоотой асуудал яригдлаа. У.Хүрэлсүхийн хувьд Ерөнхий сайдаар сонгогдоод хэлсэн үгэндээ “Би айхгүй байна. Амь насаа алдахаас ч айхгүй байна” гэж хэлсэн нь  анхаарал татахын зэрэгцээ айдас хүйдэс төрүүллээ. Амар амгалан Монгол улсад маань Ерөнхий сайдынхаа амь насанд халдах аюул заналхийлэл байгаа хэрэг үү. Ерөнхий сайд байтугай багийн дарга ч ийм үг хэлэхгүй байх.

Морин цагт ажил албаа эхлүүлсэн Монгол улсын Засгийн газрын тэргүүн  ийм бэлэггүй үгээр төрийн өндөр албаа эхлүүлж байгаа нь юуных вэ гэсэн асуултыг араасаа дагуулж байна. Өөрийгөө маш чухал хүн гэсэн хэт хэтрүүлэгтэй үнэлгээ юү, аль эсвэл намынхаа нэг хэсэг нөхдийг нийгэмд муухай харагдуулах гэсэн санаа юу. Энэ тухайд хэдийнэ янз бүрийн таамаглал хөврөөд эхэлчихэж.

Ийнхүү У.Хүрэлсүхийн тэргүүлсэн Засгийн газрын тоолол өнөөдрөөс эхэлж байна. УИХ-ын гишүүн Ж.Мөнхбатын хэлсэнчлэн “Ерөнхий сайдын зовлонг биеэрээ мэдрэх” хүрд нь эргэж эхэлж байна.

Тэрбээр өөрийгөө хананд зургаа үлдээх биш Монгол Улсынхаа төлөө хийсэн ажилтай хэлэх үгтэй Ерөнхий сайд байхын төлөө ажиллана гэдгээ илэрхийлсэн.

М.Нэргүй