Т.САЙХАН

Жүдо бөхийн насанд хүрэгчдийн 2017 оны Дэлхийн аварга шалгаруулах тэмцээн Унгарын нийслэл Будапешт хотод өчигдөр /08.28/ эхэллээ. Дэлхийн шилдэг 300 гаруй бөх хүчээ сорьж байгаа тус тэмцээнд манайхан бүх жинд оролцож буй билээ.
Тэмцээний эхний өдөр эмэгтэйчүүдийн 48 кг, эрэгтэйчүүдийн 60 кг-ын жингийн барилдаан явагдаж, медальтнууд тодров. Монголын баг тамирчдаас М.Уранцэцэг, Г.Болдбаатар, Д.Амартүвшин нар татамид гарч барилдлаа. Улмаар манай тамирчид Будапештын дэвжээнд хүчтэй өрсөлдөгчид болохоо харуулж гурван тамирчны хоёр нь медалийн тавцанд зогсож, эх орныхоо төрийн далбааг харийн тэнгэрт мандууллаа. Тодруулбал, эмэгтэйчүүдийн 48 кг-ын жинд зодоглосон дэлхийн аварга, МУГТ М.Уранцэцэг мөнгөн медаль хүртэж, Дэлхийн аваргын хос медальтай Монголын хамгийн анхны эмэгтэй жүдоч боллоо. Харин эрэгтэйчүүдийн 60 кг-д хүч үзсэн дэлхийн аварга, МУГТ Г.Болдбаатар хүрэл медаль хүртэж, мөн Дэлхийн аваргын хос медальтан болж, Монгол түмнээ баярлууллаа. М.Уранцэцэгийн тухайд эхний тойрогтоо хийлсэн манай тамирчин хоёрдугаар шатанд Румын улсын тамирчин Александра Поптой учраа таарсан.
Барилдааны эхэнд хоёр бөх шидогоор торгуулсан. Улмаар барилдаан дуусахад 1:05 минутын хугацаа үлдээд байхад манай бөх өөрийн давуу талаа хэвтээ барилдаанд гаргаж, гарт өчсөнөөр өрсөлдөгчөө цэвэр ялсан юм. Харин гуравдугаар тойргийн барилдаанд БНСУ-ын залуу тамирчин Кан Юү Жоныг цэвэр ялсан. Улмаар хэсгийн аваргын төлөөх барилдаанд Францын жүдоч Францын жүдоч Мелани Клеменийг цэвэр ялж, мөнгөн медалийн төлөө Рио-2016 олимпийн хүрэл медальт, дэлхийн аваргын алт, хүрэл медальтай, Японы бөх Ами Кондотой барилдаж, ялалт байгуулсан юм. Харин медалийн өнгө хувиргах шийдвэрлэх барилдаанд М.Уранцэцэг мөн Японы жүдоч Фүна Тонакид ялагдал хүлээлээ.
Мөн эмэгтэйчүүдийн 48 кг-д Казахстан улсын нэрийн өмнөөс барилдаж буй Монгол улсын тамирчин Г.Отгонцэцэг хүрэл медаль хүртэж, элэг нэгтнүүдээ баярлууллаа. Өөрөөр хэлбэл эмэгтэйчүүдийн 48 кг-ын жингийн медалийн тавцанд хоёр Монгол бүсгүй зогссон нь Жүдо бөхийн ДАШТ-ий онцлох үйл явдлуудын нэг байлаа. Түүнчлэн энэ жингийн медалийг Монгол улсын Ерөнхийлөгч Х.Баттулга гардуулсан нь бас нэгэн онцлох үйл явдал болсон юм. Ерөнхийлөгчийн хувьд Будапешт хотноо очиж эхний өдрийн хоёр жингийн шигшээ барилдаануудыг ОХУ-ын Ерөнхийлөгч В.Путин нарын хүмүүстэй хамт үзэж, медалийг гардуулсан билээ.

Эх сурвалж:www.polit.mn