Ерөнхийлөгчөөр Х.Баттулгыг сонгогдоход гүн туслалцаа үзүүлсэн “Хэнтийн гурвын” буюу “Тулгын Топор” У.Хүрэлсүх, урвагч Л.Оюун-Эрдэнэ, “бандааш” хочоор намаа мялаасан Д.Гантулга нарын тухай яриа эрчээ алдалгүй хөвөрсөөр байна. Хамгийн шинэ сюрприз нь Шадар сайд У.Хүрэлсүхийн “Херо”-гийн Б.Баатартай утсаар ярьсан бичлэг олон нийтэд дэлгэгдлээ. “Хүний мөр” кинонд гардаг чекистийн “Энэ буу бас сумгүй биз” гэдэг шиг “Энэ бичлэг мөн л эвлүүлэг үү, Баатар найруулагч аа”!

Таны гайхамшигт эвлүүлэгүүдийн дэргэд харамсалтай нь энэ бичлэг үнэн юм гэдгийг У.Хүрэлсүхтэй нэг удаа ч атугай үг сольж үзсэн, ядаж л телевизээр ярьж байсныг нь ухраагаад үзсэн хүн бүхэн дуу хоолойг нь таньж байна. Ерөнхийлөгчийн сонгуулийн үеэр Л.Оюун-Эрдэнэ гишүүн яагаад хэвлэлийнхнийг ахлах болсон, яагаад цаанаа л сулбагар ажиллаад байсан гэхчлэн тухайн үед МАН-ынхны дунд бөөн шүүмжлэл дагуулж учир битүүлэг байсан бүхэн өнөөдөр улам тодорхой болов. Б.Баатар найруулагчийн “Оюука” буюу Л.Оюун-Эрдэнэ гишүүн, Тулга ах буюу өнөөгийн Ерөнхийлөгчийн  өхөөрдсөн “Топор” У.Хүрэлсүх нар өрөөлийн бөхийг зассан юмсанж. Даанч прокурорын газрын тодруулгаар баталгаажуулсаар байсан хэрнээ Х.Баттулгад холбогдох хэрэгтэй хамааралтай нийтлэлүүд гацаанд ороод огт дэмжигдэхгүй байсан юм. Ерөнхийлөгчид дуулгахад “Оюука” чинь ажлаа сайн хийсэн шүү. Түүн дээр МАН-ын генсек Д.Амарбаясгаланг нэмчихэд илүүдэхгүй. Нүд рүү эгцэлж харж чадахгүйгээр “түүнд харуул”, “үүнд уншуул” гээд ноцтой мэдээллүүдийг нийтлэхийг хориглож байсан. Тэр нь пиар ч биш гэмт хэргийн чанартай мэдээллүүд байсан.

Ингэхэд Б.Баатар найруулагч хэзээнээс Шадар сайдыг “Ярих ч үгүй, хаагуур байна” гэж найзархах болов. Арай “Женко”-гийн багийнхан санал хураалтын өмнөхөн гэнэт У.Хүрэлсүхэд хайр зарлаж, бүр намтай нь дайсагнуулж байсан ч тухайн үед дассан сурснаараа “Тийм юм байхгүй” гэх даацтай мэхээ хийж няцаасан тэр үеэс биш биз. Болж өнгөрсөн үйл явдал, дээрх бичлэгийн логикоор болж тэгж харагдаж байна.

Бичлэгт ярьж байгаагаар бол Ерөнхийлөгч, Шадар сайд, “Херо” гурав уулзахаа товлож байх юм. Төрийн тэргүүн маань “өнөөдөр яг шүү” гээд эгээ л билльярд тоглох гэж байгаа хийх ажилгүй залуус шиг болзохыг бодоход тийм ч төрийн төлөө морь, нохой мэт зүтгэдэг завгүй хүн биш бололтой.

Шадар сайд хэдийгээр төрийн ажлаа хийгээд завгүй гэж ихэрхэх гэж оролдсон ч мэдээж үгүй гэж чадсангүй, айхтар “унжиж” гэмээнэ маргаашнаас уулзая гэчихдэг юм байна. Тэд уулзахдаа бидний хүндэтгэн саналаа өгсөн Ерөнхийлөгчийн сонгууль, тэдний ярьж байгаагаар бол “үлгэр домгийн ч юм шиг хөгийн, хөгийн юмаа” ярих бололтой. Тэгэхээр бид сонгуульд санал өгөв үү, жүжигт оролцоод дөрвөн жил улсаараа тоглочихов уу.

Ийнхүү “Херо” Баатар тэдний холбоочин болж дамжуулж хэлэх үгийг зөөж хэзээ уулзах завыг товлодог юмсанж. Туршлагатай гэж жигтэйхэн, хийтэй үг унагахгүй, өнөөхийг чинь хэлчихсэн байгаа шүү л гэх. Өнөөх нь мэдээж жижиг зүйл биш байж таарна. Төрийн тэргүүн болон, түүний ялалтад эсрэг талаас нь урваж тусалсан, эдүгээгийн Шадар сайд хоорондын яриа шүү дээ. Бүр ялалтынх нь 40-50 хувь нь У.Хүрэлсүхийн ач гэдгийг тэд хүлээн зөвшөөрдөг аж. Гэхдээ энд 60 тэрбумаас давсан мөнгөний тухай таамаглаж ярьж байгаа юм биш, хэн нэгэн хүнийг арчих тухай юм. Тэр нь хөөрхий МАН-аас Ерөнхийлөгчид нэр дэвшсэн М.Энхболд.

Намын дарга учраас төр дэх имиж нь эв нэгдлийн илэрхийлэл байсаар ирсэн болохоор тэр намынхандаа итгэсэн. Гэтэл хамар дор нь хутгаа ирлээд сууж байсан хайртай дүү нар нь, аль болох фракцийнхан нь гэгддэг залуусаас алсуур намын хүрээнд цуглуулсан баг нь түүнийг “түгжилджээ”.

Тэдний яриа уг нь их өрөвдөлтэй юм. Төрийн тэргүүн маань эрлийз морьдыг уралдуулахыг хориглосон талаарх Шадар сайдын мэргэн шийдвэрт их баярладаг л гэнэ, ганцаараа үзээд л суугаад байдаг юм байх. Эрлийз хүн жигшүүлэх Тулгын санаа, эрлийз морьдыг уралдуулахыг хориглосон Топорын шийдвэр хоёр жигтэйхэн нийцдэг, үүнээс болж бас ч үгүй “Топор” нь эрсдэлд орж баларснаа сануулаад орхив. Тиймдээ ч найруулагч Б.Баатарт “Чи хоёр ахыгаа уралдуулна гэсэн. Нэг нь түрүүлчихлээ” гэсэн. Гомдолтой байгаа юмсанж. Мэдээж намын даргад өрсөлдөх нь тодорхой. Түүнд нь “Женко” хариу барих ёстой байж таарч байна. Шүүмжлэх хэрэггүй дээ, “Хааны алба халаатай, эзний алба ээлжтэй” гэгчээр Женко, Топор нар хочтойгоо л үлдэнэ.

Ингээд “Херо” Б.Баатар “Ахыгаа түрүүлүүлнээ” гэж ам гараад орхив. МАН-ынхан хуралдах хэрэг байгаа юм уу. Найруулагч Б.Баатар МАН-ын дарга хэн болохыг шийдэх юм биш үү. Нэг иймэрхүү жүжиг хамгийн сүүлийн гашуун инээдийг бэлэглээд өнгөрөв. Энэ тоглоом биш л юмсан, уг нь.

Энүүхэндээ гэхэд “Женко” Х.Баттулга, “Мон-Уран”-ы буюу одоогийн УИХ-ын гишүүн Б.Наранхүүгийн гавыг тайлуулсан ачтан. Б.Наранхүү нь Гүнт дэх гэртээ М.Энхболдыг Улсын Ерөнхий прокурор агсан М.Алтанхуягтай уулзуулж У.Хүрэлсүхийн гавыг тайлуулж байсан буянтан. Харин У.Хүрэлсүх, Х.Баттулга нар нийлээд М.Энхболдыг дарж аваагүй бол Х.Баттулга Ерөнхийлөгч биш ялтан болох байсан. Тиймээс хэнийг ч үл өрөвдөж, юуг ч үл харамлаж, үзэл бодлоо ч худалдаж, МАН-ын нэр хүндийг ч шавар шавхайд хутгаж байгаад ч хамаагүй Х.Баттулга Ерөнхийлөгч, У.Хүрэлсүх МАН-ын дарга болох бололтой. Харин М.Энхболд юу болох вэ. Тэр хүнээрээ л үлдэнэ. Эв нэгдлийн илэрхийлэл болсон төрийн ноён нуруу, тулх түшиг, улс төрийн соёлыг нь хэн ч, хэнтэй ч нийлээд эвдэж үл чадна. Буруу замаар будаа тээсэн хүмүүст буцахдаа булшаа бэлтгэх боломж үлдээх хэрэгтэй шүү дээ.