Японы Ерөнхий сайд Шинзо Абегийн толгойлсон Засгийн газар бүрэн бүрэлдэхүүнээрээ саналаараа огцорлоо. Ингэж саналаараа огцорч буйгаа Засгийн газар ард түмнийхээ итгэлийг сэргээхийн тулд гаргасан шийдвэр гэсэн байна. Учир нь эрх барьж буй Либераль-Ардчилсан нам болон Ерөнхий сайд Шинзо Абэгийн чансаа огцом буурч байгаа билээ. Бүрэн бүрэлдэхүүнээрээ огцорсон Засгийн газар одоо хэдхэн цаг л ажиллана. Өнөө орой   шинэ Засгийн газар бүрдтэл тэд үүргээ гүйцэтгэж байх юм хэмээн хэвлэлүүд онцолжээ.

Улстөрийн соёлтой улс орны Ерөнхий сайд болон түүний танхимын гишүүд ийнхүү санал гаргадаг байна. Манай улсад бол байдал өөр, ард түмний итгэл бол юу ч биш. Түүнийг сэргээх тухайд бүр ч ярилтгүй, чухам яаж суудалдаа байх вэ гэдгээ бодно. Өнгөрөгч 2016 оны сонгуулиас хойш нэг жилийн хугацаа өнгөрхөд эрх баригч намд итгэх итгэл алдарсан гэдгийг хаа хаанаа мэдэж буй. “Мэргэжлийн” гэх тодотголтой Засгийн газрын нэг жил гаруйн хугацаанд хийсэн ажил гэвэл Монгол Улсын гадаад өрийг л нэмэгдүүлсэн түүхэн “гавьяа”-тай. Үүнээс үүдсэн ард түмний итгэл ч эрх баригч намд алдарсан гэдгийг саяхан болж өнгөрсөн Ерөнхийлөгчийн сонгууль харуулсан. Засгийн газар нь байгуулагдаад нэг жилийн хугацаа өнгөрсөн байхад эрх баригч намаас Ерөнхийлөгчийн сонгуульд нэр дэвшсэн М.Энхболдод ард түмэн хоёр ч удаа итгэл өгөөгүй нь үүнийг батлана. Энэ нь ерөөсөө эрх баригч нам, тэдний Засгийн газарт итгэх иргэдийн итгэл алдарчээ гэсэн үг. Тэгэхээр Ж.Эрдэнэбатын Засгийн газар Шинзо Абегийн Засгийн газар шиг өөрсдийн саналаар бүрэн бүрэлдэхүүнээрээ огцорч ард түмнийхээ итгэлийг сэргээх цаг нь болжээ.

Хэрвээ Ж.Эрдэнэбатын Засгийн газар үлгэрлэвэл айсуй 2020 оны сонгуульд арай дөмгүүр үзүүлэлт харуулах байх. Түүнээс бус энэ чигээрээ муйхарлаад байвал намаа ирэх сонгуульд ялагдалд хүргэх нь дамжиггүй.

Х.Баатар