Шинээр томилогдсон Ерөнхийлөгч ажилдаа ороод асар удаагүй ч Англи улсад суух Элчин сайд С.Баяр, Шведийн вант улсад суух Элчин сайд М.Энхсайхан нарыг эргүүлэн татах саналыг УИХ-д оруулсан нь шинэ Ерөнхийлөгч маань ажилдаа шуурхай орж, хууль бус зүйлтэй тэмцэж эхлэх нь гэсэн дохиог нийгэмд өгч чадлаа. Гэвч үүний цаана олон нөхдийг “намнах” төлөвлөгөө ч цухалзаж байна. Ерөнхийлөгчийн тамгын газрын дарга З.Энхболд энэ тухай байр сууриа илэрхийлэхдээ “”Ерөнхийлөгч ямар ч тайлбаргүйгээр Элчин сайдыг эргүүлэн татаж болно. Заавал тайлбар шаардлагатай бол бүх шатны засаг дарга нараас бусад бүх  төрийн албан хаагч улстөрийн сонгуульд оролцох эрхгүй. Сонгуулийн хуульд хэн нэгнийг дэмжиж болохгүй гэж заасан бий. Хуулийг ярихгүй юм гэхэд тухайн орон дахь Монголчуудынхаа итгэлийг дааж чадахгүй байгаа хүн яаж Элчин сайдаар ажиллах билээ. Ингэж улсынхаа нэрийг гутааж байхаар боль гэж байгаа юм” гэлээ. Энэ бол иргэдэд өгч байгаа мэдээлэл төдий зүйл болохоос биш үүний цаана маш том төлөвлөгөө байгаа гэдгийг ч албан бус эх сурвалжууд дэлгэж байна.

Шинэхэн Ерөнхийлөгч Х.Баттулга нь өрсөлдөгч МАН гэхээсээ илүүтэй АН дотроо маш олон дайсантай гэдгийг ард олон ч мэдэх болсон биз ээ. “АПУ”-ны Г.Батхүүгээс эхлээд халаагаа өгч одсон Ц.Элбэгдорж гээд өөрийнх нь нам дотор олон дайсныг дурдаж болох. Тэгэхээр тэр МАН-ын угшилтай С.Баяр, АН-ын угшилтай М.Энхсайхан нарыг эргүүлэн татах тухай саналын ар талд улстөр бизнесийн маш том бүлэглэл байгааг ч өнгөрөгч сонгуулийн үеэр олон дурдаж байсан болохоор энэ удаад хойш тавъя. Ямартай ч Элчин сайд М.Энхсайхан түр хугацаанд Монгол Улсын сайдаар ажиллахдаа Тавантолгойн мега төслийн ажлын хэсгийн ахлагчаар ажиллаж, тухайн үеийн УИХ-ын дарга, өдгөөгийн Ерөнхийлөгчийн тамгын газрын дарга З.Энхболдтой шууд утгаараа зөрчилдөж, улмаар өдгөөгийн Ерөнхийлөгчийн эхлүүлээд байсан төсөлтэй ч харшилдаж байсныг санах байх.

Энэ бүх бүлэглэлтэй шууд болон шууд бус утгаараа С.Баяр холбогддог тухай хэвлэлийн эх сурвалжууд ч олон бий. Мөнхүү саяхан зодог тайлсан Ц.Элбэгдоржийн хувьд сүүлийн хэдэн жил улстөр бизнесийн бүлэглэлийн ар талд байдаг тухай цоллуулсан. Үүнээс гадна МАН-ын нэр нөлөө бүхий нөхдийн нэр ч энэ бүлэглэлд байдгийг УИХ-ын дэд дарга Ц.Нямдорж удаа дараа нам гэлгүйгээр ил далд зарласаар ирсэн билээ. Тэгэхээр юуны өмнө энэ бүлэглэлийн хувь заяа ихээхэн ээдрээтэй болж байна. Эрх мэдэлтнүүдийн ярьж байгаагаар энэ бол маш том бүлэглэл төдийгүй гүрэн дамжсан луйварчидтай холбогдсон үндэсний хэмжэээнд аюул учруулаад байгаа бүлэглэл юм.

Үүний дараах ажиллагаа бол АН дотор байгаа мөнгөний бүлэглэлийг устгах төлөвлөгөө хэмээн эх сурвалж тайлбарлаж байна. Ямартай ч томоохон хөрөнгө бүхий төсөл төлөвлөгөөний хөтөлбөр яригдаж байхад тухайн үеийн Хууль зүйн сайд Х.Тэмүүжин, Ц.Элбэгдоржоор дэмжүүлдэг учраас хууль бус үйлдлийг хаацайлж байсан гэдгээрээ шалгуулж таарна. Нөгөө талаар Х.Тэмүүжин нэгэнтээ “Х.Баттулгын хууль бус үйлдэлтэй тэмцэх гэхээр намайг элдвээр гоочилж, сүүлдээ хүүхэнтэй хүртэл холбож, над дээр ажиллагаа явуулсан” гэж хүртэл мэдэгдэж байв. Үүний ар талд аанай л том нууц бий. Түүнчлэн Оюутолгойн гэрээнд үзэглэсэн С.Баярцогт ч энэ жагсаалтад дээгүүрт бичигдэнэ. Түүний хувьд бичигдэхээс гадна оффшор бүсэд ихээхэн хэмжээний мөнгөө мартсан гэдгээ өөрөө тайлбарласан. Х.Баттулга оффшор бүсэд байх мөнгийг эргүүлэн татах тухайд ч С.Баярцогтыг зүгээр орхихгүй. Энэ мэтээс харвал шинэхэн Ерөнхийлөгч маань нам эвсэл гэлгүй хууль бус зүйлтэй тэмцэх нь.

Харамсалтай нь ихээхэн хөрөнгө мөнгөтэй холбоотой асуудлын ар талд МАН гэхээсээ илүүтэй АН-ын нөхөд тоогоор илүүрхэж байгааг ч ажигласан биз ээ. Тэгэхээр өдгөө нам бус үндэсний эв нэгдлийг илэрхийлэгч хэдий ч АН-ын угшилтай Ерөнхийлөгч маань өөрийг нь улстөрч болгосон намаа “намнах”-аас өөр арга алга. Түүнд Монгол Улсын гурван сая гаруй иргэн, түүний дотроос өөрт нь саналаа өгч ил далд дэмжиж ирсэн хагас сая гаруй хүний итгэл найдвар хэрэгтэй юу, АН-ын доторхи арав хүрэхгүй хөрөнгөтнүүдийн эрх ашиг хэрэгтэй юу гэдгийг харах л үлдлээ.

Х.Баатар