Шинэ зууны босгон дээр буюу 2000 оны сонгуульд хиар цохиулж, ганцхан суудал авсан Ардчилсан намын лидер гэж хэлж болох залуус тухайн үедээ АНУ-д сурахаар одож байсан нь өчигдөр мэт санагдах авч, 17 жил өнгөрчээ. Ийнхүү түүх давтагддагийн жишээ гэж болох 2016 оны сонгуулиар Ардчилсан нам мөн л бут цохиулав. Харин тэд энэ удаад 2000 оных шиг ийш тийш сурахаар яваагүй бололтой. Өнгөрөгч 2012 оны сонгуулийн үр дүнд 30 гаруй суудал авч засагласан Ардчилсан намаас өнөөдөр арав хүрэхгүй нөхөр суудал авсан. Тэгэхээр үлдсэн хорь гаруй нөхөд хаа нэгэнтээ амиа борлуулж довоо шарлуулж яваа нь дамжиггүй. Тэр тусмаа С.Баярцогтыг чухам хаана юу хийж явааг сонирхож байгаа хүн цөөнгүй бололтой. Тэгэхээр түүний хэрхэн хаана юу хийж яваа тухай хөндлөнгийн эх сурвалжийн мэдээллээс сонирхуулъя.

            Эгзэгтэй цаг үед С.Баярцогтын оффшор бүсэд байршуулсан мөнгийг гадны сэтгүүлчид ил болгож, тэрбээр юу юугүй дээлээ нөмрөхдөө тулсан ч УИХ-ын дэд даргын албан тушаалаа өгч салж байсныг та бүхэн мэднэ. Тэрбээр энэ үедээ дансанд байгаа нэг сая ам.доллараа мартсан гэдгээ хэлж бантсан уу, баярхасан уу бөөн дуулиан болж байсан. Энэ тухайд төрөл бүрийн л тайлбар хийсэн, зайлуул.

            Харин одоо түүнд санаа зовох зүйл байхгүй. Оффшорт мөнгөө байршуулна уу, чингэлэг тэргэнд ачна уу хэнд хамаатай юм. Харин мэдээллийн хувьд гэвэл С.Баярцогт оффшорт байршуулсан мөнгөө өсгөхөөр гадагшаа явсан сураг чих дэлсэж байна. Тодотговол гадны нэгэн томоохон компанитай бизнесийн түншлэл байгуулсан бололтой. Тэр компани нь олон улсад уул уурхайн чиглэлд үйл ажиллагаа явуулдаг бөгөөд Англид төвтэй, Англи улсын иргэний компани гэх. Оюутолгойн гэрээг үзэглэхэд Ерөнхий сайдаар ажиллаж байсан С.Баяр Английн Элчин сайд гэх зэргээс харвал Оюутолгойн гэрээг Монгол Улсад ямар ч ашиггүй үзэглэсэн багийнхан хилийн чанад нэгдсэн юм биш үү гэж хардахаар. Тухайн үед Оюутолгойн гэрээг үзэглэсэн сайдууд “Рио Тин То”-гоос ихээхэн хэмжээний авлига авсан гэх хардлага өнөөдөр нийгэмд байсаар байна.

            Үүнийг нь батлах гэсэн шиг Ерөнхий сайд асан С.Баярын эзэмшилд АНУ-аас олон хаус илэрч, С.Баярцогт нэг сая ам.доллараа дансанд мартсан зэрэг нь үүнийг батлаад өгсөн. Нууцийн зэрэглэлтэй бүсэд мөнгө байршуулахыг бодоход тэр мөнгө лав хөдөлмөрлөөд олсон мөнгө биш гэдэг нь харагдана. Нуухаас өөр аргагүй мөнгө учраас ийн оффшордсон байх. Түүнээс ариун цагаанаараа хөдөлмөрлөөд олсон мөнгийг хэнээс юунаас нуух вэ. Монгол Улсаар дүүрэн банк байхад хадгалуулж болно ш дээ. Хэрэг хуучирдаггүй л гэдэг. Ямартай ч оффшорт нуусан мөнгөө өсгөхөөр ажиллаж байгаа С.Баярцогтод хариуцлага тооцох өдөр ирнэ гэж олон хүн найдаж буй.

Х.Баатар

Шуурхай.мн