“Татвар буй дор төр оршино” гэсэн үг бий. Тиймдээ ч эрт цагаас төрийн сан хөмрөг, энэ улс орны аюулгүй байдал гээд бүхий л зүйлийг эгэл жирийн иргэд татвараараа оршоож ирсэн түүхтэй. Татвараас зайлсхийсэн хүмүүс ч тодорхой хуулийн хариуцлага хүлээсээр ирсэн. Эдийн засгийн чамгүй хүндрэлтэй үед аж төрж бид улсдаа өгөх татвар багассан төдийгүй татвараас их бага хэмжээгээр зайлсхийх хандлага газар авсаар байна. Тэр тусмаа урлагийнханг татвар төлдөггүй гэсэн шүүмжлэл хаа сайгүй байдаг. Тэгвэл реппер Жи “Нийслэлийн шилдэг татвар төлөгч”-өөр шалгарсан аж. Үндэсний үзэлтэй гэж хэлж болох реппер Жи нь хип хопын ертөнцөд өөрийгөө хэдийнээ бий болгож чадсан төдийгүй дэлгэцийн бүтээлд ч миний буйр бий шүү гэдгээ хэд хэдэн бүтээлээр харуулж чадсан хөдөлмөрч, авьяаслаг залуу. Тиймээс өөрийнхөө ертөнцөд бүрдүүлсэн өөрийнхөө орлогоос ийнхүү улсдаа татвараа төлөөд зогсохгүй “шилдэг татвар төлөгч”-өөр шалгарсан нь сайн хэрэг. Дашрамд дурдахын зэрэгцээ урлагийнхандаа хандахад “Жи шиг л бай л даа” гэмээр байна. Хаа сайгүй уран бүтээлийн цэнгүүн хийж, энд тэндгүй алдар нь түгсэн хэн гэж ямар цуутан нь өнөөдөр “Шилдэг татвар төлөгч”-өөр шалгарч байсан юм бэ хэлээд өгөөч.

Х.Баатар

Шуурхай.мн