БСШУС-ын сайд Ж.Батсуурийг ажлын хариуцлага алдсан учраас суудлаас нь буулгасан дуулиан намдаагүй байна. Боловсролын сайдыг огцруулсан нь хариуцлага тооцож чадаж байна гэх хүмүүс байгаа ч үүний ар талд өөр хүчин зүйлс нуугдаж байгаа гэх мэдээлэл ч бий. Юутай ч энэ процесс нь төрийн өндөр алба хаагчдад өгсөн хатуухан сануулга гэхэд болно. Харин үүнээс улбаалан дараагийн хариуцлага хүлээх сайд хэн бэ гэх яриа нийгэм даяар тархаж байна.

       Юуны өмнө Батлан хамгаалахын сайд Б.Бат-Эрдэнэд хариуцлага тооцох нь зүйд нийцнэ гэдгийг хаа хаанаа ярих болов. Ж.Эрдэнэбатын Засгийн газар төрийн өндөр дээд албан тушаалтандаа хариуцлага тооцож чаддаг сайн жишиг оруулж ирж байгаа нь үнэн бол эх орноо хамгаалахаар тангараг өргөсөн эрс амь үрэгдсэн, зарим цэргийн ангид эр цэргийн амь насанд заналхийлсэн дэглэлт гарсан гээд Батлан хамгаалахын сайдыг огцруулах хангалттай шалтгаан байгааг баримтаар өгүүлэх боллоо.

       Шуудхан хэлэхэд Б.Бат-Эрдэнийг сайд болсон цагаас хойш батлан хамгаалахын салбарт тэгтлээ нар мандаагүй. Олон жилийн турш хэрэгжиж байсан хөтөлбөрт ажиллагаа нь тасалдалгүй явж байгаа болохоос биш бодитой томоохон ажил хийгдсэн эсэх нь эргэлзээтэй. Харин эсрэгээрээ цэргүүд нэгнээ дэглэв, амийг нь хөнөөв, буудав. Цэргийн хээрийн сургуулилтын үеэр гранатаа өөр дээрээ алдаж амь нас хохирсон явдал ч гарсан. Хөдөө орон нутгаас эх орныхоо зарлан дуудах аваад цэрэгт ирсэн аавын хөвгүүдэд зэвсэг хэрхэн хэрэглэх, байлдах арга ухаан заах багш, сургагч нар чухам хаана байв гээд асуудал босно. Энэ мэт наад захын асуудал нь Б.Бат-Эрдэнэ сайдыг огцрох хангалттай шалтгаан биш гэж үү.

Х.Баатар

Шуурхай.мн