Өнгөрсөн гурван жил цэнхэр дэлгэцийн өмнө үзэгчдийг уясан “Universe Best Songs” фестивалийн дөрөв дэхь удаагийн шалгаруулалт саяхан эхэлсэн. Америкийн хамгийн их үзэгчидтэй FOX телевизийн “Америкийн шүтээн” нэвтрүүлгийг хуулбарлан хийсэн уг шоуг өнгөрсөн жилүүдэд манай урлагийн акулууд гэгддэг Ариунаа, Долгион мөн Сингапур улсын хөгжмийн продюссер Рагу нар шүүж байсан билээ. Харин энэ жил шүүгчдийн бүрэлдэхүүнд өөрчлөлт гарсан байна. Тодруулбал МУГЖ Т.Ариунаа тэмцээнийг шүүхгүй болохоо мэдэгдэж, оронд нь ОХУ-ын Ардын жүжигчин Б.Амархүү шүүгчдийн суудалд заларчээ. Өчигдөр энэ жилийн тэмцээний эхний дугаар телевизээр цацагдсан бөгөөд шинэхэн бас сонихон шүүгч Амархүүгийн хувьд бусад шүүгчдийг бодвол оролцогчдод нээлттэй хандахыг эрмэлзэж буй бололтой.  Орос, монгол хэлээр хольж ярих түүний зөвлөмж заримдаа олдож ам нээх бүрдээ өөрийнхөө болоод “Народный  артист” тэмцээний тухай хавчуулж байсан нь бага зэрэг залхмаар. Хамгийн хачирхалтай нь Амархүү нүдээ аньж дуулдаг дуучдыг ер ойлгодоггүй бөгөөд тийм дуучинд дургүй юм байх. Харин  манай улсын дуучдаас “Номин талст” хамтлагийн дуучин Дэлгэрмөрөн хамгийн их нүдээ аниж дуулдаг гэгддэг. Тэгэхээр олон үгтэй шүүгч Амархүүгийн хамгийн дургүй дуучин нь Дээгий болж таарах нь.

А.Чимгээ.Factnews.mn