О.Баасанхүү гишүүн Гадаад харилцааны сайд асан Л.Эрдэнэчулууныг Ерөнхийлөгчийн сонгуульд нэр дэвшихэд тохирох хүн гэж үзэж буйгаа хэлээд байгаа. За харин Л.Эрдэнэчулуун энэ асуудлаар байр сууриа илэрхийлэхдээ  “МАХН-аас Ерөнхийлөгчид нэр дэвших санал ирсэн. Гэхдээ энэ яриа эцэслэн шийдэгдээгүй байгаа. Ийм асуудалд бодож байж хариу өгөх ёстой. Би өөрөө МАН-ын гишүүн хүн учраас намын зүгээс энэ асуудалд хэрхэн хандахыг би харах ёстой. Ер нь би залуудаа ч, нас явсан хойноо ч албан тушаал горьдож, тийш зүтгэж байгаагүй. Ийм зүйлд дургүй. Гэхдээ анхаарах ёстой хэдэн асуудал байна. Өнөөдөр улс орны эрх ашиг, гадаад бодлогын хувьд ч бодууштай, санаа зовоосон зүйлүүд үүсч байна. Би сүүлийн үед хэд хэдэн телевизэд ярилцлага өгөхдөө энэ асуудлуудад нэлээн шүүмжлэлтэй хандсан байгаа. Тийм учраас Ерөнхийлөгчид нэр дэвших тухайд аль аль талыг нь бодож байж шийдвэр гаргах хэрэгтэй гэж үзэж байна” гэсэн байгаа юм. Ингээд Л.Эрдэнэчулууны намтар мэдээллээс хүргэе.

Л.Эрдэнэчулуун 1948 онд Улаанбаатар хотод төрсөн. Монгол Улсын төрийн зүтгэлтэн С.Лувсангийн хүү.

1972 онд ЗХУ-ын Москва хот дахь Олон улсын харилцааны дээд сургууль, 1988 онд ОХУ-ын ГЯЯ-ны дэргэдэх Дипломатын Академийг тус тус дүүргэсэн.

1972-1980 онд Гадаад явдлын Яамны Олон улсын байгууллагын хэлтэст атташе, гурав, хоёрдугаар нарийн бичгийн дарга, 1980-1984 онд НҮБ дахь Байнгын төлөөлөгчийн газарт хоёр, нэгдүгээр нарийн бичгийн дарга, 1985-1990 онд ГЯЯ-ны хэвлэл, мэдээллийн хэлтсийн дарга, 1990-1996 онд Монгол Улсаас НҮБ-д суугаа Байнгын төлөөлөгчийн газарт байнгын төлөөлөгчийн орлогч, байнгын төлөөлөгч,

1997-1998 онд Монгол Улсын Ерөнхийлөгч Н.Багабандийн Гадаад бодлогын зөвлөх,

2000 оны 2 дугаар сараас МАХН-ын даргын гадаад бодлогын зөвлөх, мөн оны 7 дугаар сараас Монгол Улсын Ерөнхий сайдын гадаад бодлогын зөвлөхөөр тус тус ажиллаж байв.

2000–2004 онд Монгол Улсын Засгийн газрын гишүүн, Гадаад хэргийн сайдын албыг хашсан юм.

Эх сурвалж: Шуурхай.мн