Монгол Улсад  мөнгө санхүү ус агаар шиг хэрэгтэй байгаа. Гэвч хүсэхэд хясах гэдэг шиг тэр мөнгө нь байхгүй, Монголын мөнгөний авдар хоосон байна. Хөрөнгө мөнгөний хүлээгдэж байгаа хэрэглээг гадаадын зээл тусламжаар хангахаар төлөвлөж байна. Улсын төсөв  сүүлийн хэдэн жил байнга алдагдалтай явж ирсэн. Энэ алдагдлыг нөхөх, эдийн засгийн цусны эргэлтийг хангах нь зээлийн агуулга бас зорилго болж байна.

ОУВС-ийн хөтөлбөрт хамрагдснаар зээлийн шугам нээгдэж байна. Ерөнхийдөө энэ хөтөлбөрийг дагалдаж 3.0 тэрбум шахам ам.доллар орж ирэхээр байгаа аж. Харин хэдий хэрийн зээл тусламжийг хаанаас авч юунд зарцуулах гэж байгаа талаарх мэдээлэл төсвийн тодотголыг хэлэлцэх үеэр тодорхой болж байна.

УИХ-ын хаврын чуулган нээгдсэн эхний өдрөө Төсвийн тодотголын тухай хэлэлцэж эхэлсэн. Сангийн сайд Л.Чойжилсүрэн гишүүдийн асуултанд хариулах үеэрээ 3,0 тэрбум ам.долларын зээлийн задаргааг  хэрхэн танилцуулсныг хүргэж байна.

-ОУВС-аас 440 сая орчим ам.долларыг жилийн хоёр хувиас ихгүй хүүтэйгээр 10 жилийн хугацаатай авна.  Энэ зээлийг валютын нөөцийг нэмэгдүүлэхэд ашиглана.

-Азийн хөгжлийн банк 900 сая ам.долларын зээлийг гурван жилийн хугацаатай олгоно. Энэ зээлийн 600 саяыг төсвийн алдагдлыг санхүүжүүлэхэд зориулах бол үлдсэн 300 саяыг нь нийгмийн чанартай хөтөлбөр зорилтуудыг хэрэгжүүлэхэд ашиглана.

-Дэлхийн банк 600 сая ам.долларын зээл олгоно. Зээлийн 440 сая ам.долларыг мөн төсвийн алдагдлыг санхүүжүүлэхэд зориулж, 160 саяар нь хөтөлбөр хэрэгжүүлнэ гэж байгаа.

-УИХ-ын дарга айлчлалынхаа үеэр Япон улсаас 850 сая ам.долларын зээл авах асуудлыг үндсэндээ тохироод буй. Үүнийг 2017, 2018 оны улсын төсвийн алдагдлыг санхүүжүүлэхэд зарцуулна.

-БНСУ-аас 200 сая ам.долларын зээл авна. Үүн дээр нэмж 500 сая ам.долларын зээлийн асуудал яригдаж байгаа. Энэ зээлээр төсвөөс хийх хөрөнгө оруулалтын ажлуудыг  санхүүжүүлэхэд зориулахаар төлөвлөж байгаа аж.

Энэхүү задаргаанаас харвал нэгэнт тодорхой болоод байгаа энэ 3.0 тэрбум ам.долларын 1.6 тэрбум ам.доллараар төсвийн алдагдлыг нөхөх бол үлдсэн 1.5 тэрбум ам.доллараар уул уурхайгаас бусад салбарын өсөлтийг дэмжих төсөл, хөтөлбөрийг санхүүжүүлэхээр төлөвлөөд байгаа аж.

Засгийн газрын тэргүүний хэлж байгаагаар “Өргөтгөсөн санхүүгийн хөтөлбөр” хэрэгжих гурван жилийн хугацаанд 5.5 тэрбум ам.долларыг Монгол Улсын эдийн засагт оруулах боломжтой хэлцлүүд хийгдээд байгаа аж.

П.Булган

Zaluu.com