“Жи Тайм” корпорацийн Монгол дахь салбарын ерөнхий захирал М.Марат хилээр гарах гэж байгаад цагдаагийнхан баригдсан. Улмаар хуулийн байгууллага энэ сүлжээний бизнесийн улмаас хохирсон хүмүүсийг өргөдөл гомдлоо гаргах хэрэгтэй байгааг сануулсаар байгаа юм. Гэтэл сүүлийн үед гадуур Жи Тайм сүлжээний бизнес дампуураагүй, сургалтын бизнес хэлбэрээр үйл ажиллагаагаа явуулах болсон гэх мэдээлэл бас цацагдах болов. Мэдээллээс үзэхэд өөрийнхөө дор хүн элсүүлж мөнгө авсан хүмүүс эргээд нөгөө хүмүүсийнхээ мөнгийг олж өгөхийн тулд иймэрхүү арга сэдээд байгаа бололтой. Гэхдээ тун явуургүй арга ядсан л үйлдэл юм даа.

Казахстан улсаас манай улсад суугаа Элчин сайд  К.Кобландин “1990 онд ОХУ-д “MMM” гэсэн ийм төрлийн компани байсан. Ер нь ийм компаниуд үйлдвэрлэлийн шугамаар үйл ажиллагаа явуулдаггүй. Харин санхүүгийн пирамид хэлбэрээр үйл ажиллагаа явуулдаг. Бидний уншсанаар тус компани Монгол Улсад салбараа нээсэн байна.Тэдний ярьж байгаа шиг тус компани Казахстан улсын Ерөнхийлөгч болон бусад төрийн байгууллагатай ямар ч холбоогүй. Мөн манай Элчин сайдын яамтай ямар ч холбоогүй гэдгийг хэлье. Энэ асуудлыг Монголын цагдаа сэргийлэх, холбогдох байгууллага нь шалгаж эхэлсэн байна. Удахгүй шийдэлд хүрнэ байх гэсэн бодолтой байгаа” хэмээн хэдийнэ хэлсэн. Хууль бус гэдэг нь тов тодорхой байсаар атал Жи Тайм-ын хууль бус сүлжээний бизнесийг үргэлжлүүлэх гээд байгаа хүмүүстэй хуулийн байгууллага хариуцлага тооцох шаардлага бас үүсэх болов уу.

Хилээр гарах гэж байгаад баригдсан Ж.Маратын дансанд  6 тэрбум төгрөг байсныг битүүмжилснээс гадна шилдэг лидерүүдэд олгосон 5  ширхэг автомашин, чингэлэг дүүрэн бүтээгдэхүүнийг хураан битүүмжилсэн юм байна. Түүнчлэн Шунгитийн ордны бүтээгдэхүүн гэх гоо сайхны бүтээгдэхүүнүүд нь хүний биед сөрөг нөлөөтэй эсэхийг тогтоох ажлын хэсгийн бүрэлдэхүүн Казакстан улсад ажиллаж байгаа аж.

Тодотгоход, Монголын Үндэсний Худалдаа Аж Үйлдвэрийн Танхимаас “Жи Тайм Корпорэйшн” ХХК-ийг  2016 оны 11 сарын 18-нд Platinum гэх зэрэглэлээр бүртгэж авч байсан байдаг. Түүнчлэн  гоо сайхны бүтээгдхүүн, цай импортлогч гэсэн байдаг. Гэтэл хэрэг дээрээ тус компани ийн бүртгүүлэхээсээ хамаагүй өмнө сүлжээний бизнес хэлбэрээр үйл ажиллагаа явуулж байсан байгаа юм. Тэгэхээр Монголын Үндэсний Худалдаа Аж Үйлдвэрийн Танхимаас аливаа аж ахуйн нэгжид зэрэглэл тогтоож, бүртгэж авахдаа ямар шалгуур тогтоодог вэ, мэдээлэл хэрхэн цуглуулдаг вэ гэхчлэн асуудлууд бас энд яригдах ёстой юм.

Ямартай ч Жи Таймын удирдлагуудад  хуулийнхан олон шатлалт маркетинг буюу пирамид хэлбэрийн сүлжээний бизнес эрхэлсэн гэсэн үндэслэлээр хариуцлага тооцох юм.

 “Жи тайм” компанийн спонсор Ж гэж хүн medee.mn сайтад өгсөн тодруулгадаа  “-Энэ долоо хоногийн эхнээс манай оффис үйл ажиллагаа явуулахгүй байгаа. Хүн элсүүлэх үйл ажиллагааг түр зогсоогоод байна. Хөдөө орон нутагт ч мөн адил үйл ажиллагааг түр зогсоосон байна лээ. Хэд хоногоос манай компаний үйл ажиллагаа хэвийн үргэлжилнэ. Хууль бус зүйл хийсэн гэж бодохгүй байна. Бид бол цалинжиж ажиллаж байсан хүмүүс. Манай удирдлагуудыг шалгаж байгаа гэсэн. Гэхдээ дээрээс бид нарт санаа зовох зүйлгүй, бүхэл бүтэн улс оронд үйл ажиллагаа явуулж байгаа учраас шалгах шалгуулах ёстой зүйл гарч ирж байгаа юм гэж тайлбарласан. Хэд хоногоос компани хэвийн ажиллана гэж найдаж байгаа.” хэмээн ярьсан байдаг.   Тэгэхээр эдгээр хүмүүсийг санаа зовох зүйлгүй байж бай гээд дээрээс хэлээд байгаа хүн нь Ж.Марат нарын удирдлагуудын гар хөл бологсод байх магадлалтай юм.

Эх сурвалж: Шуурхай.мн