Монгол улсын ерөнхийлөгч Ц.Элбэгдорж өөрийнхөө хүсэлтээр Тэмээний ерөнхийлөгч Бууртай их говийн элсэн манханд уулзжээ.

Уулзалтанд говийн талаас ат, ингэ, тором, ботго тэргүүтэй тэмээн сүрэг бүрэн бүрэлдэхүүнээрээ, нөгөө талаас УИХ, ЗГ-ын гишүүд, аймаг сумын удирдлагууд оролцов. Уулзалтын төгсгөлд ерөнхийлөгч Ц.Элбэгдорж Буур нар ганцаарчлан уулзсан байна. Ингээд хоёр ерөнхийлөгчийн нүүр тулсан ярилцлагыг хүргэе:

Буур:

-Танд баяр хүргэе. Та нутгаа хамгийн их зарсан орныг удирдаж байгаа тул геннисийн номд орно.

Ц.Элбэгдорж:

-Танд ч бас баяр хүргэе. Та хамгийн ховордсон сүрэг удирдаж байгаа тул улаан номд орно.

Буур:

-Хотоор юу байна?

Ц.Элбэгдорж:

-Бөөн утаа, хөдөөгүүр юу байна? 

Буур:

-Бөөн тоос.

Ц.Элбэгдорж:

-Одоо тэгээд яая даа.  

Буур:

-Усгүй гурван сар болдог байлаа. Одоо гурван жил гүрийхээс. Идэшгүй арав хонодог байлаа. Одоо арван жил болохоос. Өлдөөд хүзүү улам сунасан шүү дээ.

Ц.Элбэгдорж:

-Картын бараанд оочерлоод килограм мах авдаг байлаа. Одоо гулуузаар нь авдаг болсон. Нормоор ганц литр сүү авдаг байлаа. Одоо торхоор нь авдаг болсон. Цатгалдаад хүзүү улам агшсан шүү дээ.

Буур:

-Ардчилсан нийгэм гэхэд шударга бус байна. Та бид хоёр адилхан ерөнхийлөгч шүү дээ. Адилхан баймаар байна.

Ц.Элбэгдорж:

-Харин тийм. Та зуугаас хоёр зуун ингэ гишгэдэг. Би ганц хатантай. Шударга байцгаая

Шог зохиолч Д.Жаргалсайхан