АН ер нь цаашдаа хэрхэх вэ гэдэг асуудал улам ужгирсаар байна. Улсын дээд шүүх намын даргаар С.Эрдэнийг хүлээж авсан ч, намынх нь дүрмийн шинэчлэлийг бүртгэсэнгүй. АН-ын нэр бүхий гишүүд С.Эрдэнийг намаа удирдаж чадахгүй байна хэмээн ээлж дараалан мэдэгдэл хийж, ил захидал хүртэл илгээсний араас Дээд шүүх ийн шийдвэрлэв. Тэгэхээр С.Эрдэнийн тухайд нөхцөл байдал тун амаргүй харагдаж байна. Мөнгөтэй хүн л нам удирдах ёстой гэх ухааны суртал ухуулгыг намын даргын сунгаа эхлэхэд хэвлэлээр хийж ирсэн тэрбээр мөнгөөр бас бүгдийг хумиж болохгүй гэдгийг харж буй биз. Дээд шүүхэд бүртгүүлээгүй, хаалттай дүрмээр сонгууль явуулбал АН юу болж хувирах вэ гэдэг асуулт мэдээж тавигдаж буй. С.Эрдэнэ дарга хэлэхдээ  “180 мянган гишүүнээрээ асуудлаа шийдүүлдэг байя гэсэн утга бүхий хоёрхон өөрчлөлт л Үндсэн дүрэмд орсон. Дотоод сонгууль зохион байгуулах асуудал одоо хүчин төгөлдөр үйлчилж байгаа дүрмийн дагуу явж байгаа. Үндсэн дүрэмд хуулинд харшилсан заалт байхгүй” гэсэн ч П.Цагаан нарын намын нөхдүүдийн зад шүүмжлээд буй намын татварын асуудлаа хаанаа хэрхэн багтааж шингээхээ С.Эрдэнэ дарга тунгааж л буй байх даа.

Эх сурвалж: Шуурхай.мн