МАХН-ын дарга Н.Энхбаярыг албан тушаалын хэрэгт холбогдуулан АТГ-аас сэжигтнээр тооцон шалгаж эхэлж, улмаар мөрдөн байцаалтын явцад түүний дүү болон туслахынх нь ахаас байцаалт авах шалтгаанууд гарсан байдаг. Тэгснээр Н.Энхбаярын дүү Н.Энхтуяа, Байгаль орчин, ногоон хөгжлийн дэд сайд Б.Тулгын ах Б.Хуягийг интерполоор эрэн сурвалжлах ажиллагаа эхэлсэн байдаг. Учир нь тэд Монголоос оргон зайлсан тул АТГ-ынхан Интерполын товчоонд хандан тэднийг эрэн сурвалжлуулах хүсэлт гаргаж байв. Гэхдээ Олон улсын эрүүгийн цагдаагийн байгууллага буюу Интерпол АТГ-ын хүсэлтийг хүлээн авч 2012 оны аравдугаар сарын эхээр өөрийн цахим хуудастаа зураг, мэдээллийг нь байршуулсан ч, үүнээс хоёр сарын дараа  цахим хуудаснаас Н.Энхтуяа, Б.Хуяг нарын мэдээлэл арчигдсан. Тэднийг Интерпол эрэн сурвалжлахаа зогсоосон гэх мэдээлэл гарч байсан.

Тэгвэл Интерполын цахим хуудаст энэ хоёр хүнийг эрэн сурвалжилж байгаа тухай мэдээллийг  дахин байршуулсан байгаа аж

Ерөнхийлөгч асан Н.Энхбаярын төрсөн дүү Н.Энхтуяаг  одоо Сингапурт улсад орогнож байх магадлалтай гэх мэдээлэл бий.  Н.Энхтуяаг ахтайгаа нийлж улсын их хэмжээний хөрөнгийг хувьдаа шамшигдуулан эх орноосоо оргон зугтсан гэж буруутгадаг гэдгийг хэлэгсэд бий.

Дэд сайд асан Б.Тулгын ах  Б.Хуяг гэх залууг мөн л Ерөнхийлөгч асан  Н.Энхбаяртай холбоотойгоор эрэн сурвалжилж ирсэн.  Тэрбээр Н.Энхтуяагийн хамт мөнгө завшиж, оргон зугтсан гэгддэг.   Б.Хуяг нь “Хар дун” компаний захирал байсан бөгөөд   “Өргөө” зочид буудлыг МАХН-ын дарга Н.Энхбаярын зааврын дагуу хууль бусаар хувьчилсан гэх хэрэгт татагдсан юм.Дэд сайдын алба хашиж байсан  Б.Тулгыг ахтай нь холбогдуулан цагдан хорьж байсан үе бий.

Н.Энхбаярт Улсын дээд шүүх 2.6 жилийн ял оноохдоо “Өргөө” зочид буудал, “Улаанбаатар таймс” сониныг хууль бусаар хувьчилж өөрийн үүсгэн байгуулсан “Эскон” компанид шилжүүлэн завшсан гэдэг нь нотолгоотой байна гэж үзсэн. Мөн түүний улсад төлөх ёстой 1.2 тэрбум төгрөгийг цайруулсан билээ.. Ерөнхийдөө холбогдох хэрэг шийдэгдсэн тул Н.Энхтуяа, Б.Хуяг нарыг нэхэн хамаатуулан шалгах шаардлага үгүй болсон уу гэдэг асуудал гарч байсан. Гэхдээ интерполоор эрж хайсан хэвээр байгаагаас үзэхэд үгүй байж болох юм.

Эх сурвалж: Шуурхай.мн