Ардчилсан Намын Ерөнхий нарын бичгийн даргын үүрэг гүйцэтгэгч Л.Эрхэмбаяр Ерөнхий сайд Ж.Эрдэнэбат танаа гэж байгаад жиргэжээ. Тэрбээр “Чингис бонд, үнэ тогтворжуулах зээлийн эргэн төлөлтийн дүнг зарлаж, ӨР НЭХЭХ ажлыг ард түмэнтэйгээ хамт ил тод хийе.” хэмээн Ерөнхий сайдад хандан уриалсан байна.

Улс орны эдийн засаг тааруу байгаа тул иргэн бүр улсдаа хандив өргөн тухай хэлж ярьж буй энэ үед түүний санаачлага цагаа олсон зүйл байж болох юм.

Ерөнхий сайдын тухайд  улсдаа 10 сая төгрөг, 10 адуу, алтан бөгж  хандивлаж, олон нийтээс дэмжлэг хүссэн  Монгол Улсын гавьяат эдийн засагч Б.Осоргарав гуайг хүлээн авч уулзсан байгаа. Уулзалтын үеэр Ерөнхий сайд Ж.Эрдэнэбат “Нэр хугарахаар яс хугар” гэж сургаж ирсэн, бидэнд эх орон хамгийн үнэ цэнэтэй. Энэ үүднээс би нэг удаагийн уулзалт дээр “Эдийн засгийн хямралыг эрсдэлгүй давах, эх орныхоо нэр хүндийг муугаар дуудуулахгүйн тулд шаардлагатай бол би ард түмэндээ ичихгүйгээр хандана” гэж хэлсэн удаатай.  Гэхдээ өнөөдөртөө тийм байдал үүсээгүй байна. Монгол Улс авсан өрөө цаг хугацаанд нь бүрэн төлнө, эдийн засгийн хямралаа ч давж чадна. УИХ, Засгийн газар, холбогдох албаныхан ажиллаж байна.  Хамгийн гол нь би таны эх оронч сэтгэл, ард түмнээ эв нэгдэлд дуудсан санаачилгыг хүндэлж, бас үнэлж байна” гэж хэлсэн.

Ер нь бол улсдаа өртэй хүмүүс өрөө төлчихөд хүндрэлийг давахад ихээхэн дэм болохыг үгүйсгэх аргагүй юм.

Эх сурвалж: Шуурхай.мн