Загварын ертөнцийн залуучуудаас өөрийн үзэл бодол, өнгө төрхөөрөө эрхгүй ялгарч чаддаг О.Амгаланбаатар хэлье гэснээ хаана ч хэлчихдэг “шийртэй” эр гэж байгаа. Реклам сурталчилгааны зураг авалтад оролцож, загвар өмсөхийн сацуу томоохон арга хэмжээнд хөтлөгчөөр ажиллаж яваадаа тун ч бахархалтай ханддаг мань эр биеэ тоосон модель хүүхнүүдэд ёстой ясны дургүй нэгэн.

Тиймдээ ч хөшигний цаана нэгнээ өөлж гоочилсон өөдгүй охидын булайг дэлгэж, бэлтэй эрчүүдийн хүчээр өдий зэрэгтэй явааг нь илэн далангүй ярихаа амласан түүнд дургүйцэх хүмүүс ч цөөнгүй бий. Тэглээ гээд загвар өмсөгч залуу бууж өгөөгүй. Цахим ертөнцөд өөрийн үзэл бодлыг шулуухан илэрхийлдэг О.Амгаланбаатар өнөөдөр ийнхүү харамсан бичиглэжээ.

Тэрбээр “Эрээнд байгаа 1800 орчим, Хонконгт байгаа 200 гаруй, Сингапурт мөн төдий тооны гээд сурах, гэрээгээр ажиллах нэрээр мөн ч олон охидоо буруу зүгээр алдаж дээ. Бүсгүйчүүдээ биш бүтээгдэхүүнүүдээ экспортлохсон!!! Эргэж ирээд тэд маань ээж, хүний хань болно л гэнэ дээ. Болохоос ч яахав дээ!!! Жич: Албан бус ч дөхөх тоо баримтанд үндэслэв” хэмээн цахим хуудсаараа дамжуулан олон нийтэд хүргэлээ. Гучин насны босго дөхөж яваа хэдий ч эхнэр авах тухайд төдийлөн бодох завгүй яваа тэрбээр ийнхүү эмзэглэх нь арга ч үгүй биз.