Говьсүмбэр аймгийн Засаг дарга Ж.Баянмөнхийг ШШГЕГ-ын Цагдан хорих 461 дүгээр ангид хориод багагүй хугацаа өнгөрлөө. Түүнийг Шивээговь сум дахь орон нутгийн өмчит “Илчлэг шивээ”үйлдвэрийн газрыг хууль бусаар  хувьчлахыг завдсан хэмээн Авлигатай тэмцэх газрын мөрдөн байцаагчид Эрүүгийн хуулийн 263.2, 264.2 гэсэн зүйл ангиар буруутгаж, сэжигтнээр татсан. Сүхбаатар дүүргийн шүүхээс түүнд 14 хоногийн хугацаатай цагдан хорих, таслан сэргийлэх арга хэмжээ авсан нь өнгөрсөн баасан гаригт дуусчээ. Энэ талаар Ж.Баянмөнхийн өмгөөлөгчөөс тодруулахад, “Шүүх түүнийг батлан даалтад гаргах боломжгүй гэж үзсэн. Иймээс түүний хоригдох хугацааг 30 хоногоор сунгалаа” гэв. Энэ хэрэг мандсантай холбоотойгоор Ж.Баянмөнх 12 жил хашсан Засаг даргын ажлаасаа чөлөөлөгдөх өргөдлөө Ерөнхий сайдад өгсөн байна. Уг асуудлыг МАН-ын Удирдах зөвлөлөөр хэлэлцэх бөгөөд одоогоор Говьсүмбэрээс гаралтай МАН-ын бага хурлын гишүүн, НАМЗХ-ын ерөнхий нарийн бичгийн дарга О.Алтансүхийн нэр Засаг даргад яригдаж байгаа юм.