МАХН-ын дарга Н.Энхбаярт 500 сая төгрөгийн хандив өгсөн С.Дашдондог гэж хүн  мөнгөө буцааж авах гэж нэхээд өгөхгүй болохоор нь АТГ-т хандсанаа зарлаад байсан. Худалдан авах ажиллагааны газрын дарга асан С.Дашдондог гэж хүн МАХН-ын дарга Н.Энхбаярт намын санхүүжилт нэрээр 500 сая төгрөгийг өгч. Тэр мөнгийг өгснийхөө дараа буцаан авах хүсэлт гаргахад нь Н.Энхбаяр өгөхгүй гэж хэлээд “Уг асуудлаар АТГ-т ханд” /2015.9.23-ны өдөр/ гэж хэлсэн гэх мэдээлэл байсан.

Түүнчлэн С.Дашдондог өөрийн нүүр номондоо “Г.Шийлэгдамба болон П.Цогтбаатар нар шиг шоронд орох, над шиг бүх насан туршдаа үнэнчээр зүтгэж босгосон нэр хүнд- капиталаа Н.Энхбаяр даргад завшуулчих вий гэж болгоомжлох үүднээс залуус дүү нартаа анхааралтай хандахыг ахмад хүний хувьд зөвлөж байна” хэмээн бичсэн байсан.

Тэгвэл тэрбээр medee.mn сайтад өгсөн ярилцлагадаа  “….Нийслэлийн прокурор, АТГ-ын бичиг байгаа. Таны 547 сая төгрөг өгсөн баримтаар нотлогдож байна гэж аль аль нь хариу өгсөн байгаа. Эрүүгийн хэрэг үүсгэж болохгүй байна. Учир нь нэгд, Энхбаяр төрийн албан хаагч биш, хоёрт та өөрийнх нь гарт биш, намдаа өгсөн юм байна. Шүүхээр явж шийдүүлж болно гэсэн утгатай хариу өгсөн. Одоо надад шүүхээр явахад нэг нотолгоо бий болчихож байгаа байхгүй юу.” хэмээн ярьсан байна.  Мөн тэрбээр Н.Энхбаярыг сонгож дагаснаараа их зүйл алдсан гэх утгатай юм ярьсан байна.

Тэрбээр “Асар их хохирол амсаж байж Энхбаярын саналыг хүлээж авсан шүү. Би С.Баяр, одоогийн МАН-ын удирдлагад байгаа лидерүүд, ахмадуудтай харьцаа муугүй байсан. Москвад Баяр Элчин сайд, би консулаар ажиллаж байсан. Сайхан гар нийлж ажиллаж байсан, сайн найз нар. Энхбаяртай уулзсанаас болж одоо Баяртай утсаар ярьж, баяр ч хүргэж чадахгүй байгаа. Мөс чанар зовоогоод байна шүү дээ, дотроос. Энхбаярыг сонгохдоо би өөр дээрээ маш том капиталаараа дэнчин тавьж, хохирсон… Намайг хүмүүс урваж шарвасан гэж ярьдаг. Би тэгээгүй. Нэг л намын батлахтай хэвээрээ. Энхбаяр дарга ч наад батлах чинь хүчин төгөлдөр хэвээрээ, сайн сайхан батлах л гэсэн.”   хэмээн ярьжээ.

Эх сурвалж: Шуурхай.мн