Хол мэт санагдаж асан 2017 он гарч, бид өр зээлээ төлж эхлэх ёстой болжээ. Гэтэл мөнгө байдаггүй. Ядарсан нэг өрх айлын зураглалыг өнөөдрийн монголын төр засгаас олж харахад хүрч  байна. Хөгжлийн банкны 580 сая ам.долларын өрийг энэ оны эхний улиралд багтаан төлөх ёстой. Гэвч чадамжгүй байгаа тул зээлийн эргэн төлөлтийг сунгах уу гэдэг асуудал гарч ирж байгаа. Тэгвэл Засгийн газрын хэрэг эрхлэх газрын дарга Ж.Мөнхбат энэ асуудлаар байр сууриа илэрхийлэхдээ “Өнөөгийн байдлаар эдийн засаг хүнд, бэлэн мөнгөний төлөлт хийхэд маш хүндхэн байгаа. Олон улсад гурван янзын л хувилбар бий. Бэлэн мөнгөөр төлөх, хугацааг хойшлуулах, төлж чадахгүй нь гэдгээ зарладаг. Мэдээж эхний болон сүүлийн хувилбар бол Монголд өнөөдөртөө хүнд. Бэлэн мөнгөөр төлөхөд эдийн засгийн нөхцөл, ачаалал дийлэх боломж нь хомс. Мөн “бид үүнийг төлж чадахгүй нь ээ” хэмээн зарлана гэдэг улс орны хувьд хүнд нөхцөл байдлыг үүсгэнэ. Тиймээс дундын хувилбар нь манай улсын өнөөгийн эдийн засгийн нөхцөлд хамгийн зөв хувилбар юм уу гэж яригдаж байгаа. Гэхдээ эцсийн шийдэл гараагүй. Удахгүй ОУВС-гийн баг ирж уулзалт хийнэ. Энэ сангийн хөтөлбөрийг хүлээж авах эсэх асуудал сардаа багтаж нэг талдаа шийдэгдэнэ.” гэж байна.

Эх сурвалж: Шуурхай.мн