Гадаад харилцааны сайд Ц.Мөнх-Оргилын тухайд нэлээд асуудалтай байгаа гэхэд болно. Өнгөрсөн жилүүдэд Далай лам манай улсад найман ч удаа ирсэн байхад, Ц.Мөнх-Оргил шиг ингэтлээ асуудалд хутгалдаж байсан сайд бараг байхгүй. Ер нь түүнийг гадаад харилцаагаа мэдэж байна уу гэдэг асуудал яригдаж байгаа. Дипломат албаны тухай хуульд нэмэлт, өөрчлөлт оруулах тухай хуулийн төсөл Төрийн байгуулалтын байнгын хороогоор хэлэлцэгдэх үед  Л.Болд гишүүн уг хуулийн төсөлд шүүмжлэлтэй хандаж, сайдыг шүүмжилж нэлээд юм болоод авсан. Тэрбээр  “Засгийн газар дэндүү өрөвдөлтэй хуулийн төсөл оруулж ирлээ. 35 хүүхдийн цэцэрлэгийн мөнгө олж өгөхийн тулд дөрвөн дипломат газрыг татан буулгаж байна. Засгийн газар ийм юм бичихээсээ ичихгүй байна уу? Өнгөрсөн парламентын үед НҮБ-ын байнгын төлөөлөгчийг Элчин сайд болгосон. Одоо та нар НҮБ-ыг УИХ-аар хэлэлцдэг байсныг болиулах хууль оруулж ирж байна. Гадаад харилцааг ингэж хөгжүүлдэг цаг үе ирсэн юм уу. Та бүхэн гадаад харилцаандаа мөнгөө нэм. Хүүхдийн цэцэрлэгийн мөнгийг ямар нэг төсөл хөтөлбөрөөс ч олж зохицуулж болно. Монгол Улсын нэр хүндийг бүс нутагт унагаж байна.Латин Америкийг тэр чигээр нь хариуцдаг газраа татан буулгах нь буруу. Японы талаас “Танайх консулын газраа татан буулгах нь буруу. Эргэж харах хэрэгтэй шүү” гээд хэлж байна. Гадаад харилцааг ингэж хөгжүүлдэггүй юм, Ц.Мөнх-Оргил оо” гэж хатуухан хэлээд авсан. Харин  Ц.Мөнх-Оргил сайд  “Хаана тийм танилцуулга байгаа юм бэ. Л.Болд оо, битгий мушгиад бай” гээд өнгөрөөсөн. Мөн сайдыг нам нэгт нөхөд нь өмгөөлж хамгаалаад аваад гарсан гэхэд болно. Л.Болдын тухайд мөн л гадаад харилцааны сайд байсан. Салбарын туршлага сэлтээр бусад гишүүдээс хавь илүү нэгэн гэдэгтэй маргах юун. Нөгөө номын ахаасаа үг сонсох ёстой гэдэг шиг, Ц.Мөнх-Оргилын тухайд Л.Болдын үгийг сонсоход гэмгүй дээ.

Эх сурвалж: Шуурхай.мн