АН-ынхаа даргыг сонгох эрхээ гишүүд нь шинэчилсэн бүртгэлдээ хамрагдаж байж олж авах ёстой. Гишүүдийн бүртгэлийн хугацаа  энэ сарын 6-нд буюу нөгөөдөр хаагдах ёстой. Харин энэ сарын 28-нд намын даргын сонгуулийн санал хураалт өндөрлөж, 29-ний  өдөр гэхэд АН  шинэ даргатай болсон байх юм.  Гэхдээ АН-ын 180 мянган гишүүний  17 мянга нь л шинэчилсэн бүртгэлд хамрагджээ. Үлдсэн бага хугацаанд энэ тоо төдийлөн нэмэгдэхгүй нь ойлгомжтой болж байгаа юм. Тэгэхээр АН-ын шинэ даргын сонгууль 17 мянган гишүүний сонголтоор шийдэгдэнэ гэж харагдаж байна. Хэрэг дээрээ бол намын гишүүдийн шинэ бүртгэл дээр тус намын фракциудын хоорондын өрсөлдөөн, хор  явагдаж байна гэх мэдээлэл байгаа юм. Түүнчлэн тухайн аймаг, дүүргийн Ардчилсан намд одоо бүртгэлтэй байгаа гишүүдийн олонх нь сунгаанд нэр дэвшигчдээс хэнийг дэмжих магадлалтай байна вэ гэдгийг харгалзан бүртгэлийг нээж, хааж байгаа нь нууц биш болоод байна.

Тус намын ерөнхий нарийн бичгийн даргын үүрэг гүйцэтгэгч Л.Эрхэмбаяр намын батлахаа гээгдүүлсэн болон АН-д шинээр элсэх хүмүүсийг  намын даргын сонгуульд оролцож саналаа өгөх эрхтэй бүртгэхээр болж мэдэгдсэн ч, хэрэг дээрээ бол сценарийн дагуух  үйл явц өрнөж байгааг хэлэгсэд байна.  Хэдийгээр Л.Эрхэмбаяр дарга  “-Намд зохиомол гишүүд үүсэх вий гэдгийг ярилцсан. Гэхдээ АН шинэчлэгдэхдээ нээлттэй байх ёстой гэж үзэж байгаа. Тиймээс АН-д элсэх сонирхолтой бүх хүнд нээлттэй байх нь зүйтэй гэж үзсэн. Намын даргад өрсөлдөж байгаа хүмүүс ч үүнийг хүлээн зөвшөөрсөн”гэж байсан юм.

Эх сурвалж: Шуурхай.мн