УИХ дахь  Ардчилсан намын бүлэг Хөгжлийн банкны талаар авах зарим арга хэмжээний тухай асуудлаар өчигдөр тав хоногийн завсарлага авсан. Тэгвэл тэд завсарлахаа больжээ. Тус намын бүлэг дотооддоо асуудлаа хэлэлцээд ингэж шийдсэн байна. Тиймээс чуулганаар Хөгжлийн банктай холбоотой асуудлыг хэлэлцэж байна. Асуудлыг хаалттай, нээлттэй хэлэлцэнэ гэх саналууд гишүүдээс гарсан. Тэгээд санал хурааж нээлттэй хэлэлцүүлэхээр болов. Гишүүд Хөгжлийн банктай холбоотой анхаарал татсан байр суурийг илэрхийлж байна.

Л.Оюун-Эрдэнэ гишүүн  “Эхний ээлжинд төлөх 580 сая ам.доллараа яах гэж байна вэ. Дефолт гэдэг чинь 2-3 сарын дотор болохоор болчихоод байна. Үүнийг өнөөдөр хэн ч ярихгүй байна. Ямар ч шийдэл гарахгүй байна. Дефолт болвол 50 жил, цаашлаад 70 жил эдийн засаг саарна. Өнөөгийн нөхцөл байдлыг харахад эдийн засгийн хямрал биш эрх дархтнуудын хямрал болсон байна. Чуулган анх эхэлж байхад бидэнд боломж байсан. Цаг хугацаа байсан. Одоо цаг хугацаа ч байхгүй болж байна. Улсын төсөв орлого талдаа 5 их наяд төгрөг. Гэтэл Хөгжлийн банкнаас түүнтэй тэнцэх хэмжээний зээл гаргасан ч 70 хувь нь эргэн төлөгдөхөөргүй байна. Дор бүрнээ жижиг асуудал ярьсаар яст мэлхийн хурдаар ажиллаж байна” гэсэн бол Ө.Энхтүвшин гишүүний тухайд, Хөгжлийн банкийг эргээд харахад үр могой төрүүлсэн байна. Бүтэн нэг жилийн төсвийн орлоготой тэнцэх хэмжээний мөнгө үрэн таран хийсэн байна. Үүнийг нь ярих гэхээр зээлжих зэрэглэл буурна, адилхан хувааж идсэн уусан гэдэг зүйл ярьдаг. Хариуцлага гэдэг зүйлийг 65 суудалтай манай нам ярихгүй байгаа шүү. Хариуцлага гэдэг үгийг хэлж байгаа ч үйлдэл болохгүй байгаа шүү.” гэж байна.

Б.Пүрэвдорж  гишүүн “Монгол банкны Ерөнхийлөгч нь банкуудаа муулсаар байгаад зэрэглэлийг нь бууруулсан. Хөгжлийн банкны шалгалтын асуудал тусдаа зүйл. Бид тав хоногийн хугацаатай завсарлага авахдаа олон нийтийн анхааралд оруулж, зөрчил байхгүй юм гэдгийг мэдэгдэхийг хүссэн. Хөгжлийн банкны асуудлаар авсан завсарлагаа дуусгаж байна” гэж байсан юм.

Эх сурвалж: Шуурхай.мн