2016 он 07 сар 12-н Төв цэнгэлдэх хүрээлэн
Энэ жилийн Ардын төрийнхөө баяр наадамд Улсын заан Ч.Санжаадамба Р.Пүрэвдавгаар 10 даван түрүүлж Улсын аварга хэмээх эрхэм хүндтэй цолны эзэн боллоо. Олон жил бөх сонирхогчдын Аварга болно хэмээн хүсэн хүлээсэн Санжаадамба заан ийнхүү 30 насандаа хүсэл мөрөөдлөө биелүүлсэн билээ. Анх 16 настай Санжаа хөвгүүн 2001 онд бөх болохоор Хашаат сумаас нийслэл хотод ирэн Зэвэгийн Дүвчин багшийн шавь болсон байдаг.

Багшийгаа даган бэлтгэл хийсээр 2011 онд улсын цолтоны эгнээнд одоогийн улсын харцага Өлзийтогтохын Бат-Оршихтой барилдан давсанаар нэгдсэн байдаг.. Заал танхимын бүхий л барилдаан, Монгол туургатаны барилдаанууд, Өвөрмонголын үзэмчин бөх, Гиннесийн барилдаанд хүртэл түрүүлсэн түүнд ганцхан төрийн наадмын түрүү л дутуу байсан.
Энэ жилийн наадамд тавын даваанд аймгийн арслан А.Отгонбаатар, .6-д а.а Л.Шинэбаатар нарын давсан юм. Түүнд долоогийн даваанд ам авах маш чанга байсан. Мөнхийн өрсөлдөгч Ц.Содномдорж, Б.Пүрэвсайхан, уран барилдаанд Т.Баасанхүү нар түүнийг харж байсан. Санжаа заан шижигнэсэн гурван бөхөөс Төрөөгийн Баасанхүүг амлан авч барилдан давсанаар Заан хэмээх цолоо дахин баталсан.

Наймын даваанд тэрээр ам авах биш тунарах нь тодорхой болсон байдаг. Хэрэв С.Мөнхбат аварга Г.Эрхэмбаярыг амлаагүй бол наадам яаж эргэх байсан нь тун сонин. Өмнөх жилийн түрүү бөх Энхтөгсийн Оюунболдтой тунан барилдаж шинэ цолны эрх атгасан тэрбээр есийн даваанд Улсын аварга Гунаажавын Эрхэмбаяртай барилдан түрүүлэх мөрөөдөлдөө нэг алхам ойртсон юм.

Аварга болох шийдвэрлэх барилдаанд Арын сайхан хангайн хоёр бөх хүч үзэн Улсын заан Ч.Санжаадамба Улсын начин Рэнцэнбямбын Пүрэвдагвыг хаян түрүүлж олон жилийн хүлээлтээ эцэс болгосон билээ. 2015-2016 оны улирлын заал танхимын барилдаанууд Санжаадамба төдийлөн сайн барилдаагүйг бөх сонирхогчид сайн мэдэж байгаа.
“Хань” хэмээх уран сайхны кинонд “Сайн бөх жилдээ ганц л удаа л барилддаг” гэдэг шиг Санжаа Улсын наадамдаа л түрүүлэх гэж өөрийгөө олон янзаар туршаад байсан хэрэг.

Тулгар төр байгуулагдсаны 2225 жил, Их Монгол улсын 810 жил, Үндэсний Эрх чөлөөний хөдөлгөөний 105 жил, Ардын Хувьсгалын 95 жилийн түүхт ой давхацсан Улсын баяр наадмын Үндэсний бөхийн барилдаанд 1024 бөх барилдаж Архангай аймгийн Хашаат сумын харьяат, улсын заан Ч.Санжаадамба 10 даван түрүүлж Ардын төрийн наадмын 22 дахь, Архангай аймгаас төрөн гарсан 5 дахь аварга цолтон болж байна. 1921 оноос хойш Ардын төрийн наадамд Архангай аймгаас Г.Вандан, Н.Жамъян, Ц.Чимэд-Очир, Г.Өсөхбаяр аваргууд төрөн гараад байсан бол Ч.Санжаадамба 5 дахь аварга цолтон болж байна.

Ч.Амартүвшин