АН сүүлийн 7 жилд анх удаагаа Их хурлаа хийж байна. Ардчилсан намын Их хуралдаа оролцохоор З.Энхболд, Н.Алтанхуяг, Я.Санжмятав, Н.Батбаяр, Ч.Сайханбилэг, Р.Амаржаргал, М.Зоригт, Ц.Оюунгэрэл, Д.Эрдэнэбат, С.Одонтуяа, С.Ламбаа, Л.Эрхэмбаяр нар хүрэлцэн иржээ.

Соёлын төв өргөөнд эхлээд байгаа тус намын Зургадугаар их хуралднийтдээ 1210 төлөөлөгч оролцож байна. Тэдгээрийн 450 нь намын анхан шатны байгууллагаас сонгогдсон төлөөлөгч бол үлдсэн нь АН-ын хуучин сэтэртнүүд. Энэ тухай нийтлэлч Б.Баабарын онож жиргэснээр бол фракциудын төлөөлөл юм.

Зун, намар өвлийн эхэн сард намаа шинэчлэхээр хангалттай ярьсан паризанууд болон залуусын хүчийг намынх нь фракцууд хэдийн нуга дарсан нь ойлгомжтой болоод байгааг төлөөлөгч сонгосон үйл ажиллагаа харуулсан, Мөн өчигдөр шөнө дүл хүртэл хуралдсан хуучин ҮЗХ Их хурлынхаа үйл ажиллагааг өөрчилсөн тухай яриа хангалттай сонсогдож байна.

Тухайлбал, АН-ын фракцууд намын дүрмээс илүүтэй даргын суудалд ач холбогдол өгч хоорондоо тохиролцоо хийсэн бололтой. АН-ынхан Их хурлаа нээчихээд шөнө завсарлуулаад эргэж өглөө хуралдах хооронд заримыгаа сайхан амар гэж явуулчихаад хор найруулж, мөнгө тараагаад асуудлыг шийдчихдэг. Тухайлахад 2009 оны Ерөнхийлөгчийн сонгуульд өрсөлдөх нэр дэвшигчийг тодруулах ажиллагаа яг ийм зарчмаар болж билээ.

Тэр үед АН-аас Ерөнхийлөгчийн сонгуульд нэр дэвшихээр 6 нэр дэвшигч тодорч Ц.Элбэгдорж, Э.Бат-Үүл нар үлдэж байлаа. Тухайн үед АН-ын дарга асан Н.Алтанхуяг Их сургуулийн ангижав Э.Бат-Үүлийгээ “Миний хөгшин хариад сайхан амарчих. Маргааш чи…” гэсэн гэдэг. Тиймээс ч маргаашийн хуралд маадгар ирсэн Э.Бат-Үүл өрсөлдөгч нь тодормогц “Бархирмаар санагдсан хором”-оо бичиж байлаа.

Тэгвэл АН-ын фракцууд энэ удаагийн Их хурлаа ч иймэрхүү замаар явуулах гэж байна гэж хардах хүмүүс олон байна.

Уг нь АН Их хурлаараа үзэл баримтлал, үндсэн дүрмээ хэлэлцэж, шинэ дүрмийн дагуу сар шинийн өмнөхөн шинэ даргаа саналын эрхтэй нийт гишүүдээсээ сонгоно гэсэн мэдээллийг Ардчилсан намын Гүйцэтгэх зөвлөлөөс өгч байлаа. Гэвч, өчигдөр шөнө орой болтол хуралдсан Үндэсний зөвлөлдөх хорооны хурлын дараа өнөөдөр болох Их хурлын үйл ажиллагаа өрнөх сценийг өөрчилсөн гэлцэнэ.

АН-ын Их хурал эхлэхтэй зэрэгцээд С.Эрдэнэ, Г.Батхүү нар урьд шөнөжингөө унтах завгүй хор найруулсан гэх хардлага ч гарч байна. Тэднийг Их хурлынхаа 1210 төлөөлөгчийн 900-г нь багцалж, хүн тус бүрт 500 мянган төгрөг тараасан гэх сургийг ч сайтууд бичиж байна.

АН-ын даргад өрсөлдөнө хэмээн П.Цагаан, Д.Эрдэнэбат, Л.Болд, С.Эрдэнэ, Ж.Батзандан, Лу.Гантөмөр Г.Батхүү, М.Чимэддорж нар Их хурлаас өмнө зарласан.

Гэвч АН-ын фракцууд Г.Батхүү, С.Эрдэнэ нарын нэгийг өнөө маргаашгүй намынхаа дарга болгох тохироог хийчихсэн хэмээх хардлага ийнхүү Их хурал эхлэхтэй хамт яригдаад эхэллээ. Энэ үнэн бол бусад нөхдүүд нь Э.Бат-Үүл шиг бархирцгаах болов уу. Харж л сууя.

Г.Самбаа

Gereg.mn