Гэр бүлийн хүчирхийлэлтэй тэмцэх асуудлын чухлыг хууль тогтоох дээд байгууллагын гишүүд нэг л сайн ухаж ойлгодоггүй бололтой юм. Ямартаа л нэр бүхий гишүүд нийлж лообби бүлэг байгуулжээ, уг асуудлаар.

О.Баасанхүү, Ж.Батзандан, Н.Энхболд, Д.Цогтбаатар, Д.Сарангэрэл, Х.Нямбаатар, Н.Амарзаяа, М.Билэгт нарын гишүүд нийлж  Гэр бүлийн хүчирхийлэлтэй тэмцэх лообби бүлгийг байгуулсан тухайгаа УИХ-ын дарга М.Энхболдод албан бичгээр хүргүүлээд байгаа юм. Тэдний лобби бүлэг нь гэр бүлийн хүчирхийлэлтэй тэмцэх, хууль тогтоомжийг боловсронгуй болгох, бүтэц зохион байгуулалт, тогтолцоог орчин үеийн шинэ шатанд гаргах, асуудлыг судлах, шаардлагатай хөрөнгө санхүүг УИХ-аар батлуулах зорилготой гэж байсан.

Тэд лобби бүлэг байгуулснаар өнөөгийн нийгэмд тулгамдаад байгаа асуудлын нэг болох гэр бүлийн хүчирхийллийн асуудлыг төрийн хууль тогтоох дээд байгууллагын түвшинд авч үзэж, тогтолцоог боловсронгуй болгох, нийгмээрээ уг хууль бус үйл ажиллагааг таслах зогсооход хувь нэмэр оруулах шаардлагатай хэмээн үзсэн гэж байгаа юм.

Тэгэхээр лообби бүлэг байгуулахгүй л бол гэр бүлийн хүчирхийллийг огт авч хэлэлцдэггүй хэдэн хүн УИХ-д суугаа бололтой.

Эх сурвалж: Шуурхай.мн