Үргэлж хэл амны бай болж, хэрэг төвөгт ч хэдэнтээ хутгалдаад авсан эрэн сурвалжлах сэтгүүлзүйд үнэтэй хувь нэмэр оруулж яваа сэтгүүлч Л.Мөнхбаясгаланд дургүй гэхээсээ илүү түүнээс “дөлж” зугтаах эрх мэдэлтнүүд олон. Салбар салбарын өөрсдийн гэсэн өнгө аястай олон зочдын бусдад яриагүйг яриулж үзэгч түмэнд өндрөөр үнэлүүлж яваа түүнд тохиолдох саад тотгор хамгийн эцэстээ нэвтрүүлгээ зогсооход хүргэв. Өнгөрсөн 5-р сард АНУ -ын Вашигтон хотод орших олон улсын эрэн сурвалжлах сэтгүүлчдийн холбоо руу явах гэж байхад нь онгоц нисэхээс 2 цагийн өмнө түүнд эрүүгийн хэрэг үүсгэж хилийн хориг тавьсан билээ. Харин энэхүү хэргийг бүтэн 5 сар гөрдөж шалгасаны эцэст Нийслэлийн прокуророос гэмт хэрэг үйлдээгүй хэмээн үзэж өнгөрсөн долоо хоногт хэргийг хэрэгсэхгүй болгожээ. Тэрээр өөрийн цахим хуудаснаа “Энэ хооронд юу эсийг үзэж, юу эсийг туулав. Харин үр дүн нь юу байв. Анхнаасаа л эрх мэдэлтэнүүдэд таалагдаагүй, бүр ТВ гээр гаргахыг нь хориглож байсан “Цензургүй сурвалжлага” хэмээх эрэн сурвалжлах нэвтрүүлгээ бүрмөсөн зогсоолоо. Амьнаас үнэтэй, амьдралаас үнэтэй нэвтрүүлэг гэж юу байхав. Ардчилал, хэвлэн нийтлэх эрх чөлөөнд итгэж элэн халин нисч явсаныхаа төлөөсийг би төллөө. Төлөх ч ёстой юм. Гэхдээ энэ бол жижиг асуудал. Цаг нь ирэхээр дахиад л цаг хугацааны гяндангаас суллаж авна “Цензургүй сурвалжлага” -аа… Харин энэ хооронд итгэж найдаж явсан зүйл худлаа байсныг, хамтран зүтгэгч, үзэл бодол нэгтэй гэж бодож явсан хүмүүс өмнөөс салаавч үзүүлэхийг харах л хэцүү байлаа. Гэхдээ энэ бүхнээс би хатуужиж, хэрсүүжиж насандаа баймгүй хашир болоод босч ирэв. Намайг далимдуулан хэрэгтэн болгох гэсэн, хамаг л муу муухай бүхнээр дэвсэж гутаахыг оролдсон бүхэнд би гомдоогүй, харин ч баярлалаа. Учир нь тэд үнэн нүүр царайгаа нуугаагүй юм. Харин миний зөв гэдгийг мэдэж байсан атлаа, намайг хэрэг хийгээгүй гэдгийг мэдэж байсан мөртлөө дуугараагүй амаа жимийж байсан нөхдөдөө би гомдсон. Тэд нүүр царайгаа, итгэл үнэмшлээ нуусан. Тэд жинхэнэ аюултай…. Зуны халуун өдрүүдэд Улаанбаатараас ч гарах эрхгүй шаналж суухад утсаа авдаг нь хэд байлаа. Гэхдээ энэ бүхнийг би гэр бүлийнхээ хамт давж гарлаа. Юм дуусаагүй гэдгийг би мэднэ. Дургүй хүргэвэл дахиад хэрэгт гүтгэнэ гэдгийг ч ойлгоно. Гэхдээ Монголд шударга хуульчид бүрмөсөн алга болчихоогүй байгад баярланам. Хэцүү хүнд үед бүтэн 4 сар ажил хийгээгүй тэр үед туслаж дэмжиж, хажууд минь байж хань болсон хүмүүст талархаж байна. Нэрийг нь дурдмааргүй байна, гай болж мэднэ. Хамгаас илүү зовсон нь хань минь юм даа. Чамдаа хязгааргүй хайртай даа” хэмээн бичсэн энэхүү мэдэгдэлд нь цензургүй яриа нэвтрүүлгийн үзэгчид тун сэтгэл дундуур үлдэв.

Эх сурвалж:Шуурхай.мн