Топ модель, жүжигчин, алтны магнатын экс амраг гэсэн үгс нэрнийх нь өмнө үргэлж зүүлт мэт дагалддаг П.Пүрэвсүрэн SBN телевизийн “Бүсгүй ааль” нэвтрүүлэгт оролцож, сонирхолтой яриа өрнүүллээ. Хамгийн сүүлд тэрээр “Сэдхил” хэмээх кинонд тоглосон байна.

Уралдаан тэмцээнд оролцохдоо хүүхэд ахуй зангаараа түрүүлчих юм бол ингэж ярилцлага өгнө гээд толины өмнө бэлддэг байсныгаа бодлын хүч биелдэг гэдэгтэй холбон тайлбарласан юм.

Охиноо загвар өмсөгч болгох уу гэсэн асуултад:

“Би 15 настайдаа өсвөр насныхны загварын тэмцээн “Монголжингоо”-д түрүүлж байсан. “Шилмэл загвар”-ын Дунгаамаа захирал заавал ирээрэй гэж тэр үед захисан. Ингээд Байгал багшид анх шавь орж байлаа.

Одоо охин маань 13-тай 8-р анги, дуулж бүжиглэх дуртай. Загвар өмсөгч гэхээсээ илүү мэйк ап чиглэлийг сонирхдог болохоор будаг шунх авч өгч охиноо дэмждэг” гэж хариулсан юм. Сүүлийн үед түүнийг тайзаа орхиж байгаа талаар хэвлэлээр шуугиад авсан. Харин тэрээр загварын тайзны хувьд зодог тайлсан ч фото моделиороо цаашид үргэлжлүүлэн ажиллах гэнэ.

Гурван хүүхдийн ээж болж намба төрх суусан үзэсгэлэнт бүсгүй аав ээжийнхээ талаар нулимс унаган ярьсан юм. “Хүн найз нөхдөдөө хайртай гэж хүссэн цагтаа хэлдэг мөртлөө аав ээждээ хайртай гэж хэлэх гэхээр нэг л ичээд байгаа юм уу гэмээр мэдрэмж төрөөд байнга хэлж чаддаггүй”.