Ерөнхий сайд асан Н.Алтанхуягийн эхнэр Э.Сэлэнгийн хилээр гарах эрхийг хориглосон гэх мэдээллийг прокурорын байгууллагын эх сурвалж үгүйсгэхгүй байгаа. Энэ сарын 5-ны өдөр Э.Сэлэнгийг  Герман улс руу зорчихоор Москва-Берлиний чиглэлийн онгоцоор нисэх гэж байхад нь хуулийнхан саатуулсныг хэвлэлийнхэн мэдээлж байгаа билээ. Тэгвэл түүнд хилийн хориг тавих болсон үндэслэл нь Э.Сэлэнгийн дансаар их хэмжээний мөнгө шилжиж орсонтой холбоотой гэх мэдээлэл байна. Түүний дансанд их хэмжээний мөнгө, ямар эх үүсвэрээр орсоныг шалгаж тогтоохоор хуулийнхан ханцуй шамласан гэх мэдээлэл байгаа юм. Ерөнхий сайд асан Н.Алтанхуягийн эхнэрийн хувьд эрүүгийн хэрэг үүсгэсэн асуудал байхгүй ч, асууж шалгах шаардлагатай зүйл байгаа бололтой байна.

За мөн  АТГ-т шалгагдаж буй “Эрдэнэс Тавантолгой” компанийн ТУЗ-ийн дарга, ЗГХЭГ-ын дэд дарга асан Г.Дэнзэнгийн хэрэгтэй холбоотойгоор  Н.Алтанхуягийн эхнэр Э.Сэлэнгэд хилээр гарах хориг тавьсан гэх мэдээллийг хуулийн байгууллагын эх сурвалж өгсөн гэх мэдээлэл байгаа юм.

Ерөнхий сайд асны эхнэрт хилийн хориг тавьсан нь Н.Алтанхуягт өгч байгаа улстөрийн агуулгатай сануулга уу гэдэг асуудал яах аргагүй гарч ирж байгаа. Гэхдээ хэрэв түүний эхнэрийн дансаар сэжигтэй гүйлгээ хийгдсэн нь үнэн бол хуулийнханд өөр учиг байж бас болохыг үгүйсгэхгүй.

Сануулахад, Н.Алтанхуягийн охин А.Саранзаяаг  “Нүүрс” хөтөлбөртэй холбоотойгоор  АТГ-аас шалгаж байсан ч хэрэгсэхгүй болгосон байдаг.  За мөн түүний  хүргэн гэгдэх ЗГХЭГ-ын дэд дарга Г.Дэнзэнгийн асуудал одоо шалгагдаж байгаа гээд харвал Н.Алтанхуягийн эргэн тойрныхныг хуулийнхан үлдээхгүй шалгаж мэдэхээр байна. Хуудуутай байгаа бол хуулийнхан шалгах нь мэдээж тодорхой. Энэ талаар эргэн мэдээлнэ.

Эх сурвалж: Шуурхай.мн