Сонин тохиолдол юм шүү, нэг айлын хоёр охин, усны дусал мэт ижилхэн эгч дүү хоёр Монголын цуутай boyband “Камертон”-ы хамгийн мундаг 2 гишүүний галыг сахих гэргий болно гэдэг.

Ахмад циркчдийн нэг, МУГЖ Д.Жанчивдорж гуайн 2 охин хар багаасаа циркийн урлаг, уран нугаралтын гайхамшгийг харийн орнуудад сурталчилж ирсэн авьяаслаг охид. Том эгч Ж.Бямбасүрэн нь Эбатай суугаад удаагүй байхад дүү Ж.Бямбажав нь Болдтой үерхэж эхэлсэн гэдэг.

Айлын гэргий болсноосоо хойш циркийн урлагаа орхиж, имижмейкэр, make up artist-ын мэргэжлээрээ ажиллаж, эр нөхрүүдийнхээ найдвартай ар тал болох болсон эгч дүү хоёр үлгэр жишээ гэрийн эзэгтэй нар.

Хатагтай Ж.Бямбасүрэн эр нөхөртөө 4 хүүхэд төрүүлж өгөн, Алдарт эхийн болзол хангаад байна. Өнгөрсөн 11-р сарын 22-нд Солонгост мэндэлсэн охиндоо Эба Өөдлөн хэмээх өвөрмөц нэр хайрласан байна. Өөдлөн охины ах нар мөн л Солонгост үр суулгах аргаар төрсөн ихрүүд гэдгийг уншигчид маань андахгүй.

Тэгвэл Төрийн соёрхол аваад удаагүй байгаа Д.Болдын гэргий 2012 онд эр нөхөртөө 3 дахь хүүхдийг нь төрүүлж өгөхөөр шийджээ. Хөл хүнд хатагтай Ж.Бямбажав ирэх 4-р сарын эхээр амаржих юм байна. Хосууд Эгшиглэн охин, Энэр хүүтэй билээ.

“Гранд” сэтгүүл