Хэчнээн хоногийн өмнөөс Үүл баатар цензургүй ярина гэх шуум тарснаар багагүй хүлээлт үүссэн байв.

Учир нь Э.Бат-Үүл гэдэг хүн сонин содондоо бус ардчиллын анхдагчийн амийг хөнөөсөн хэрэг өнөө хүртэл илрээгүй, үүнд нь энэ хүний нэр холбогдсоор ирсэн. Мөн 18 жилийн дараа хоёронтаа энэ хэрэгт Үүл баатрыг яллагдагчаар татсан учраас, ийм цаг үед цензургүй ярихаар болсон учраас түүний тайлбар сонин байлаа.

Гэтэл ердөө л “Өнөөдөр ч би сонин хүн хэвээрээ” гэж батлах гэсэн мэт эс бөгөөс “Ардчилал гэж би ба бусад нь юм” гэж хэлэхийн тулд сенсаацтай нэвтрүүлэгт оров уу гэлтэй. Болоогүй 2017 он хүртэл халуун сэдэв хэвээр байх Ерөнхийлөгчийн сонгуульд хүч үзнэ гэдгээ ч чанга дуугаар зарлах гэж цензургүй ярихаар болсон бололтой юм.

С.Зоригийн хэрэгтэй холбоотойгоор ярьсан Үүл баатрын ярианаас шинэ мэдээлэл эсвэл сэдэв огт гарсангүй. Өөрөөр хэлбэл, өнгөрсөн хугацаанд дуулиан шуугиантайгаар хэвлэлийн хурал хийн, яллагдагчаар дахин татлаа хэмээн зарлах үедээ ярьснаа л ярив.  Үндсэндээ өнөөдрийг хүртэл хэвлэлээр улиг болтол ярьснаа давтсан нь нэвтрүүлэгт оролцсон Э.Бат-Үүлийн зорилгыг улам ч тарамдуулж орхив.

Харин энэ удаагийн ярилцлагаараа тэрбээр Нийслэлийн прокурорын газрыг үгүйсгэж орхив. Тодруулбал, тус газрын хяналтын прокурор Б.Батжаргал “Мөрдөн байцаалтын ажиллагааны явцад Э.Бат-Үүлийг сэжигтэн, яллагдагчаар татах үндэслэл гарч ирсэн учраас шалгаж байна. Түүнээс биш сонгуультай холбоотойгоор, улс төрийн зорилгоор шалгаагүй. 18 жилийн дараа анх удаа шинжилгээ авч байгаа тухайд хэрэг гарсны дараа хэргийн газарт нэвтэрсэн бүх хүнээс холбогдох шинжилгээний дээж авсан.

Э.Бат-Үүлийн хувьд өмнө нь хурууны хээг нь хэд хэдэн удаа авч байсан. Хэрэгт мөрдөн байцаалтын ажиллагаа явуулж байгаа ажпын хэсгийн мөрдөн байцаагч шинжилгээ авах шаардлагатай байгааг өөрт нь мэдэгдэж байсан ч тодорхой шалтгааны улмаас хойшлуулж байсан” хэмээн албан ёсны тайлбар өгсөн байдаг.

Харин түүний яриаг Э.Бат-Үүл илт үгүйсгэж, ийм зүйл болоогүй хэмээв. Ямартай ч хэн нь үнэн ярьсныг хэлж мэдэх боломжгүй ч Үүл баатар хуулийнхны албан ёсны тайлбарыг зоригтойгоор үгүйсгэж лав дөнгөлөө. Цаашилбал, тэрбээр “Би хэзээ ч албан тушаалын араас хөөцөлдөж байгаагүй” гэв.

Гэсэн атлаа Ерөнхийлөгчийн сонгуульд өрсөлдөнө гэх. Хотын даргаар ажиллаж байсан, одоо бүр номер нэгийн суудалд санаархаж яваа атлаа ийн ярих нь суурин дээрээ хэд эргэсэн явдал болов.

Эцсийн дүнд нь нийслэлийн АН-ыг тэргүүлдэг ч орон нутгийн сонгуульд ямар ч оролцоогүй байгаагаа зарлаж орхив. Үнэндээ АН-д эзлэх түүний байр суурь мөхөж байгаа бололтой юм.

Хэдийгээр намын дүрмээр нийслэлийн намын дарга сонгуульд оролцдоггүй гэх халхавч маягийн тайлбар хийсэн ч Үүлийн цаг дууссаныг түүний байр байдал бэлхнээ илтгэх шиг. Сүүлийн үед бичиж байгаа шигээ Ц.Элбэгдоржийг үгүйсгэх, намынхаа нөхдийг баалах, ардчиллын амин сүнсийг залгиж байгааг ярьсаар цаг дуусав. Үнэндээ тэр энэ удаад халуун сэдвээр дамжуулан намынхаа нөхдөд гомдлын үгээ дайлаа. Хажуугаар нь “амь тавьж буй” ардчиллын тухай ярьдгаа л нуршин ярив.

Ямар ч байсан энэ мэтээр Үүл баатар өөрийгөө “моод”-ноос гаргахгүйн төлөө өдөр шөнөгүй ажиллах л бололтой. Харин үр дүн ямар байхыг үлдсэн хугацаанд түүний хийх нүүдлүүдээс шууд хамаарах билээ.