Дэлхийн 140 орчим нөлөө бүхий улстөрчдийн нууц хөрөнгө бүхий 11.5 сая оффшор дансны нууц материалыг Олон Улсын Эрэн сурвалжлах сэтгүүлчдийн консорциум 78 орны 107 хэвлэл мэдээллийн байгууллага хамтран ил болгож, олон нийтэд зарласан. Дэлхий даяар уг мэдээллийг “Панамын материал” гэж тодотгож байгаа. Тэдгээр мэдээлэл дунд манай улсын нэр бүхий улстөрчид, бизнесмэнүүдтэй холбоотой мэдээлэл байсан. Тэгвэл хэдэн өдрийн өмнө Олон улсын Эрэн сурвалжлах сэтгүүлчдийн консорциум Багамын арлуудад бүртгэлтэй оффшор данстай компаниудын баримтыг дэлгэсний дотор мөн л манай улсаас Ерөнхий сайд асан С.Батболдтой холбоотой мэдээлэл гарч ирсэн.

Тэгэхээр эдгээр нь юуг өгүүлээд байна вэ гэхээр манай эрх мэдэлтнүүдийн хувьд оффшор тийш хөрөнгө мөнгөө зөөгөөд, тэнд нутагшуулаад, дотоодын эдийн засгаасаа холдуулаад уджээ. Ер нь тодорхой зохицуулалтууд хийгдэх цаг болж гэдгийг л харуулаад байгаа хэрэг юм. Тэгвэл засгийн хуралдаанаар оффшор бүсэд данс эзэмших, мөнгө байршуулахыг хориглохтой холбоотой  төслийг УИХ-д өргөн барихаар шийдвэрлээд байна. Засгийн албан мэдээнд энэ талаар өгүүлэхдээ “Сүүлийн жилүүдэд төрийн албан хаагчдыг оффшор бүсэд гадаадын хөрөнгө оруулалттай компанийн хувьцаа эзэмшсэн, банкны данс нээсэн тохиолдолд тэднийг авлига, албан тушаалын хэрэгтэй холбоотой гэх хардлага эрс нэмэгдэж, энэ хэрээр төрд итгэх иргэдийн итгэл буурч байна. Иймээс Засгийн газар Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийг хэлэлцээд УИХ-д өргөн барихаар боллоо.

Авлигатай тэмцэх газарт хөрөнгө орлогын мэдүүлэг гаргадаг төрийн албан тушаалтанд оффшор бүсэд өөрийн нэр дээр данс эзэмших, мөнгө байршуулах, хуулийн этгээд байгуулах зэргийг хориглох, зөрчсөн тохиолдолд хүлээлгэх хариуцлагыг төсөлд тусгасан байна.

Хууль батлагдсанаар төрийн албан тушаалтны ёс зүй, хууль дээдлэх үүрэг, хариуцлага нэмэгдэж, иргэд, бизнесийнхэн төр, төрийн байгууллагад итгэх итгэл нэмэгдэн, авлигын эсрэг хууль тогтоомжийг нэг мөр хэрэгжүүлэхэд дэмжлэг болно гэж Засгийн газар үзлээ. Манай улсад 110 орны 13140 хамтарсан болон дагнасан хөрөнгө оруулалттай компани бүртгэгдсэний 920 нь буюу долоон хувь нь оффшор бүсийн хөрөнгө оруулагчид юм байна. 1990-2015 оны хооронд Монгол Улсад нийт 14.2 тэрбум ам.долларын гадаадын хөрөнгө оруулалт орсны 10.8 тэрбум ам.доллар нь оффшор бүсийн улс орнуудаас хийгдсэн талаар өгүүлж байна.

За ямартай ч оффшор бүсэд хөрөнгөө аваачсан нөхдүүд ёсзүйн хувьд хариуцлага хүлээх ёстой, хуулиар бол хүлээлгэх хариуцлага байхгүй гэдэг байсан цаг ард хоцорч магадгүй л сонсогдож байна. Гэхдээ хуулийн төслийг гацаадаг жишиг манайд бий гэдгийг санахад илүүдэхгүй биз ээ

Эх сурвалж: Шуурхай.мн