Засгийн газар төлөвлөсөн үйл ажиллагаануудаа гүйцэлдүүлэх хөрөнгө мөнгийг хаанаас босгох вэ гэдэг асуултад хариулт нэхэгдэж байгаа. Нэгэнтээ төсвийн орлого дутуу гучуу байгаа үед дахин өрийн бичиг гаргаж гаднаас зээл авах уу, эсвэл  “Стэнд бай” хөтөлбөрт хамрагдах уу гэцгээж байгаа юм. Тэгвэл ЗГХЭГ-ын дарга хэлэхдээ “Албан ёсоор бонд босгоно гэдэг шийдвэр эцэслэж гараагүй байна. Эдийн засгийн сэргээх хэд хэдэн хувилбар яригдаж байгаа. Хөгжлийн зээл авах уу, “Стэнд бай” хөтөлбөрт хамрагдах уу гэх мэтээр. Боломжуудаа судалж байна. Монгол Улсын төсвийн алдагдал дээд цэгтээ хүрчихсэн тийм төсөв санхүү хүлээж аваад Засгийн газар 14 хоногийн дараа ажиллаж эхэлсэн. Сарын дараа төсвийн тодотгол хийсэн. Бодит нөхцөл байдлыг нийтэд зарласан. Үүнээс гадна янз янзын асуудал бий. Жишээ нь 1,6 их наяд төгрөгтэй тэнцэх хэмжээний концесс ямар ч хяналтгүй, нэг сайд, орон нутгийн даргын үзэгний үзүүрээр шийдэгдээд явчихсан байна. Энэ нь эргээд улсад өр, эдийн засагт маш том дарамт болоод үлдчихсэн. Векселийн асуудал байна. Яриад байвал олон зүйл бий. Тиймээс эдийн засгийг сэргээх хоёр, гурван хувилбар гарган, тооцоо судалгаа хийж байна. Гэхдээ эцсийн шийдэл ямар ч байдлаар гараагүй байгаа.”гэсэн байна.