АН-ын Үндэсний зөвлөлдөх хорооны хурал ээлжит бус чуулгантай давхцсан учраас хойшлуулаад байсан билээ. АН-ынхан хэлэхдээ чуулганы хуралдаанаар улс орны эрх ашигтай холбоотой чухал асуудлууд хэлэлцэж байхад  намын дотоод асуудал яамай байна гээд хойшлуулсан гэж байсан. Тэгвэл маргааш тус намын Үндэсний зөвлөлдөх хороо хуралдах гэж байна. Орон нутгийн сонгуулийг угтан АН-ынхан бөөндөө нэг цуглах гэж байгаа нь энэ юм. Сонгуульд ялагдсан АН-ын өмнө шинэчлэгдэх үү гэдэг асуудал эхэнд тавигдаж байгаа гэх  ч, хэрэг дээрээ бол фракц хоорондын  тэмцэл хийгээд тохирооны асуудал сонгуулиас хойш өнөөдрийг хүртэл үргэлжилж байгааг ч хэлэгсэд бий.

Намаа хэн удирдах вэ гэдэг асуултад хариулт нь болохоор С.Эрдэнэ, Г.Батхүү, Лу.Гантөмөр, Д.Эрдэнэбат, П.Цагаан нарын хүмүүсийн нэрс яригдаж буй. Гэхдээ АН даргаа жинхлэх хүртэл бас хугацаа орох байх. Маргааш болох хуралдаанаар намын даргын үүрэг гүйцэтгэгчийг дахин сонгоно гэх мэдээлэл байгаа юм. Д.Эрдэнэбатын тухайд намаа даргын хувиар удирдах зорилготой байгаа тул үүрэг гүйцэтгэгчээс татгалзсан гэх мэдээлэл байгаа юм. Гол нь үүрэг гүйцэтгэгч намын даргын сонгуульд өрсөлдөх боломжгүй тул түүний хувьд замаа зассан бололтой. За мөн хуралдаанаар Ерөнхий нарийн бичгийн даргын үүрэг гүйцэтгэгчийг томилож магадгүй бөгөөд энэ удаагийн орон нутгийн сонгуульд үүрэг гүйцэтгэгчид нуруундаа ачаа үүрэх бололтой байна.

Нэг ёсондоо орон нутгийн сонгуулийн  өмнө АН-ын дарга болж, азаа үзэх тэнэг хүн одоогоор байхгүй тул, үүрэг гүйцэтгэгчид нэртэй нөхдүүд хэсэгтээ ирж таарах бололтой.

Эх сурвалж: Б.Итгэл, Шуурхай.мн