Чуулганы  хуралдаанаар Монгол Улсын нэгдсэн төсвийн 2015 оны гүйцэтгэл, Засгийн газрын санхүүгийн нэгтгэсэн тайлан, “Монгол Улсын 2015 оны төсвийн гүйцэтгэлийг батлах тухай” Улсын Их Хурлын тогтоолын төслийн хоёр дахь хэлэлцүүлгийг хийж,  УИХ дахь МАН, АН-ын бүлгүүд дүгнэлтээ танилцуулж,  зарчмын зөрүүтэй саналаар санал хурааж байгаа юм.

Хэлэлцэж байгаа асуудалтай холбогдуулан УИХ дахь АН-ын бүлгийн дарга С.Эрдэнэ бүлгийн дүгнэлтээ танилцуулахдаа хэлсэн үгэндээ “Засгийн газраас өргөн мэдүүлсэн хуулийн төслүүдийн 4 тогтоолын төсөл нь ард иргэдийг үл хүндэтгэсэн, эдийн засгийг улам доройтуулах заалт агуулсан гэж АН-ын бүлэг үзэж байна. Зарим төрлийн татвар нэмэх, төрийн албан хаагчдын цалинг хасах, тэтгэмж бууруулах, оюутны тэтгэлгийг зогсоох  зэрэг хуулийн төслийг оруулж ирсэн байна. Энэ нь эдийн засгийг улам хямраах төсөл болжээ. Мөн Төсвийн тогтвортой байдлын хуулийн заалтаас ухарч  өрийн таазыг нэмэгдүүлж, хөрөнгө оруулагчдын эрхзүйн тогтвортой байдлыг алдагдуулжээ. Хуулийн төслүүдэд хямралыг тодорхой хугацаанд шийдвэрлэх арга хэмжээний талаар тусгагдаагүй. Засгийн газар эдийн засгийн хямралыг тодорхойлж чадахгүй мухардалд оржээ.  Зарим хуулиудыг буцаасан нь УИХ Засгийн газартаа итгэл үзүүлэхгүй байгаагийн тод жишээ юм” гэж хэллээ.