Засгийн газрын үйл ажиллагааны эхлэлтэй холбоотойгоор АН-ын цөөн хэдэн  гишүүд хатуу үгсийг чамгүй хэлж байгаа. Л.Болд гишүүний тухайд өнгөрсөн жилүүдэд намынх нь сэдэж, хэрэгжүүлж ирсэн ажлуудыг улстөр үнэртүүлэн зогсоож байгаад ууртай байгаа. Түүнчлэн тэрбээр хэвлэлд ярихдаа “Улс төр гэдэг чинь улс төрийн үзэл бодлын тэмцлийг хэлдэг болохоос биш өөрийнхөө танил тал, хамаатан саднуудыг ажилд тавихыг улс төр болгочихсон. Нөгөө талаасаа улс оронд хэрэгтэй, ард түмэнд ашигтай бодитой ажлуудыг зогсоохыг улс төр гээд бодчихсон. Нэг талд нь эдийн засгаа донсолгоонд оруулах мэдэгдлүүд хийгээд, нөгөө талд нь ямар ч гарц байхгүй. Гарцгүй 100 хоногоо өнгөрөөх юм бол Засгийн газар хэцүү болно. Энэ засгаас болоод бүх зүйл муухай болоосой гэж хүсэхгүй. Улс орон сайхан болоосой л гэж хүснэ шүү дээ… Намын бүлгийн хаалттай хуралдаан нь саяхан ил болсон байсан. Уг нь үнэн, зөв ярьж байгаа гишүүд байна. Гэтэл чуулган дээр орж ирээд баг зүүгээд худлаа яриад байх юм. Анх мэргэжлийн Засгийн газар нь тусдаа, хяналт тавиад ажиллуулна гэж байсан. Гэтэл Засгийн газар нь парламентынхаа дээр гарчихсан, намын удирдах зөвлөл шийд гаргаад Засгийн газар хүчээр хэрэгжүүлээд гишүүд ард түмнээс авсан мандатаа хэрэгжүүлж чадахгүй болчихоод байгаа юм. Зүгээр л дуулгавартай кноп дардаг хүүхэлдэй болоод байна шүү дээ. Үүнийг хүлээн зөвшөөрч болохгүй.” хэмээн ярьж байна.