Сэтгүүлчийн хувийн мэдээллийг албаны шугмаар бус хувиараа олж авахаар зүтгэж байгаа нь хуульд хэр нийцэх бол гэдэг нь хачирхалтай-
Өнгөрсөн амралтын өдөр буюу бямба гарагт ШШГЕГ-ын харьяа Хэнтий аймаг дахь Хорих 0419 дүгээр ангиас хулгайн гэмт хэргээр 2.3 жилийн хорих ял эдэлж байсан Хэнтий аймгийн харьяат 30 настай ялтан Ж.Даваахүү хадлангийн өвс бэлтгэх ажилд дайчлагдах үеэрээ оргон зайлж одоог хүртэл олдоогүй байна. Тодруулбал, тэрбээр өнгөрсөн зургаадугаар сарын эхээр шүүхээс Эрүүгийн хуулийн 145.2-оор 2.3 жилийн ял сонсч байсан нэгэн аж. Ямартай ч тэрбээр тус хорих ангид эдлэх ёстой ялынхаа гурван сарыг элээж байхдаа ийнхүү оргон зайлжээ.
Тэгвэл түүнийг эрэн сурвалжлах ажиллагааг Хэнтий аймгийн хорих ангийн удирдлагууд болон ШШГЕГ-аас зохион байгуулсан ч өөрсдөө хүчрэхгүйн улмаас цагдаагийн байгууллагааас тусламж авч эрэн хайх ажиллагааг эхлүүлээд байгаа юм байна.

Ямартай ч дээрх ялтанг оргосон талаарх мэдээллийг тус газрын удирдлагууд ихэд нууцалж мэдээллийг гадагш нь гаргахгүй байх үүргийг ч өгөөд байгаа аж. Яг үнэндээ өнгөрсөн хугацаанд хорих ангиас ялтан оргосон тохиолдолд цагдаагийн байгууллагаас ард иргэддээ сэрэмжлүүлэг хүргэж болгоомжтой байхыг анхааруулдаг байсан. Хэрвээ уншигчид санаж буй бол 2014 оны есдүгээр сарын 4-ны өдөр Цагдан хорих 461 дүгээр ангиас хоёр сэжигтэн оргосонтой холбоотойгоор тус ангийн даргаар ажиллаж байсан хурандаа Ч.Очгэрэлийг үүрэгт ажлаас чөлөөлж байсан. Түүнчлэн оргосон хоёр сэжигтэнг эрэн хайх ажиллагаанд тухайн үед ШШГЕГ-ын дарга асан хурандаа С.Баяндалай ч өөрийн биеэр оролцож тэднийг олж байв. Гэтэл бусдын эд хөрөнгийг хулгайлж шүүхээс ял сонссон гэмт этгээд өнөөг хүртэл олдоогүй байхад юуны учир тэд өөрсдийнхөө энэ мэт алдааг нууцалж байхыг хүснэ вэ. Мэдээж нууц юм гэж үгүйтэй адил аль болж бүтэхгүй байгаа бусармаг зүйл олон нийтэд хэзээ нэгэн цагт ил болдог жамтай.

Ялтан нас барсан тухай мэдээллийг бас л нууцлаж байна
Гэтэл тус газрын тухай мэдээлэл гарах бүрт ШШГЕГ-ын зарим удирдлагууд ажилчдаа дуудаж хэн энэ мэдээллийг өгсөн гэж нүүрийг нь улалзуулаад зогсохгүй бичсэн сэтгүүлчийнх нь хувийн мэдээллийг олж ав хэмээн үүрэгддэг байна. Угтаа бол хулгай хийсэн хүн би таны юмыг хулгайлах гэж байна шүү гэж хэлдэггүйтэй адил сэтгүүлчид баталгаатай, нотолгоотой баримтыг олон нийтэд мэдээллэх үүргийг хүлээдэг. Бүр тодруулбал бид эх сурвалж, баримт нотолгоогүй мэдээллийг олон нийтэд цацдаггүй гэсэн үг. Гэтэл хууль хүчний байгууллагад өндөр албан тушаал хашдагаараа далайлган сэтгүүлчийн хувийн мэдээллийг албаны шугмаар бус хувиараа олж авахаар зүтгэж байгаа нь хуульд хэр нийцэх бол гэдэг нь хачирхалтай. Яг үнэндээ тус газартай холбоотой мэдээлэл өмнө нь хэвлэл мэдээллийн хэрэгслээр олон гарч байсан. Гэхдээ одоогийнх шиг ингэж бусармаг загнаж байгаагүй гэдгийг хэлэх хэрэгтэй байх. Харин ч тэд болсон үйл явдлын талаар тодорхой мэдээллийг олон нийтэд өгдөг байсан удаатай. Ямартай ч ШШГЕГ-т өрнөж буй үйл явдал үүгээр дуусахгүй. Тухайлбал, өнгөрсөн амралтын өдөр Дархан-Уул аймгийн Хорих 445 дугаар ангид ял эдэлж байсан ялтан эмнэлгийн тусламж авч чадалгүй нас барсан хэрэг гарч бас л энэ асуудлыг нууцлаж чандлахыг үүрэгдээд буй аж. Тэгэхээр тус газарт яаралтай агаар салхи оруулж зарим нэг удирдлагуудыг нь сольж, шинэчлэхгүй бол олон мянган алба хаагч хэдий хүртэл айдас хүйдсийн дор албан үүргээ гүйцэтгэх бол гэдэг нь анхаарал татах асуудлын нэг. Юутай ч өнөөдөр тус газрын даргаар томилогдохоор зэхэж буй генерал Ц.Амгаланбаяр ч энэ мэт асуудлыг анхааралдаа авч асуудлыг эцэслэн шийдэх байх даа.
Эх сурвалж: