Хар үгээр хэлбэр МАН-ынхны гэдэс дотор сүүлийн өдрүүдэд сүрхий эвгүйрхээд байгаа янзтай. Ямартаа л шинэхэн засгийн шинэ Ерөнхий сайд Ж.Эрдэнэбатыг огцруулах саналыг МАН дотроосоо гаргаж, гарын үсэг зурж эхэлсэн гэх бор шувуу нисэх болов. Гэхдээ энэ нь бодлогын чанартай мэдээлэл байхыг үгүйсгэх аргагүй л дээ.  Ө.Энхтүвшин эрхэм засгаас авч хэрэгжүүлэх гээд байгаа бодлого шийдвэртэй холбоотойгоор хэлэхдээ “Ер нь аливаа шийдвэр гаргахдаа сонгуульд авч орсон мөрийн хөтөлбөрөө байнга санаж байх хэрэгтэй. Түүнээс илүү бодлогын баримт бичиг гэж байхгүй. Олон нийтээр хэлэлцүүлээд дэмжлэг авч УИХ-д 65 суудалтай болгосон чухал баримт бичиг шүү дээ. Энэ баримт бичигт нийцээгүй шийдвэр гаргах гэж байгаа бол дэмжихгүй. Ингэлээ гээд намын бодлогоос хазайлаа гэх л байх. Гэхдээ иргэдэд өгсөн амлалтаа мартаж болохгүй. Хөдөө орон нутагт ажиллаж иргэдтэй уулзахаар мөрийн хөтөлбөр барьж байгаад энэ амлалтууд юу болсон гээд л асууна.” хэмээн хэлж байсан.

За харин Ерөнхий сайдын тухайд МАН-ын бүлгийн хуралдаан дээрээ “Бид өмнө нь 26-уулаа байхдаа хүнд таалагдахын тулд юу ч хамаагүй ярьдаг байсан. Харин одоо тэр зарчмаараа дуртай үедээ хэвлэлд хандаад яриад байж болохгүй. Одоо бол популизм хийх цаг биш. Хамгийн гол нь хэрэгжүүлэх гэж буй бодлогоо эхнээс нь олон нийтэд зөв ойлгуулах хэрэгтэй. Татвар нэмэх нь гэж хамаагүй эсэргүүцээд эцэст нь юу болов. Төсвийн байнгын хороо татвартай холбоотой хуулийн төслүүдийг унагасанд харамсч байна. Аливаа зүйлийг эхлээд бүгдээрээ зөв талаас нь тайлбарлах хэрэгтэй” гэсэн байгаа. Уг нь тэгээд нэгэнтээ түмний итгэлээр олонхоороо гараад ирсэн МАН 2020 он хүртэл энэ улс орны төлөө дөмөгхөн шиг зүтгэчих хэрэгтэй л байгаа юм даа.

Сануулахад, Ж.Эрдэнэбатын Засгийн газар Эдийн засгийн хүндрэлийг даван туулах онцгой бодлого, Эдийн засгийн тогтвортой өсөлтийг хангах бодлого, Нийгмийн бодлого, Байгаль орчин ногоон хөгжлийн бодлого, Засаглалын бодлого гэсэн 5 үндсэн бүлэг, 381 заалтаас бүрдсэн хөтөлбөртэй байгаа. Засгийн газрын 2016-2020 оны үйл ажиллагааны хөтөлбөрийн хөгжлийн бодлогын гол чиглэл нь эдийн засгийн төрөлжилтийг бүрдүүлэхээс гадна өсөлтийг бий болгож байгаа хүчин зүйлээ төрөлжүүлэх гэж буй. Үүнээс гүйцэтгэх засаглал хүндэрсэн эдийн засгийг үе шаттайгаар анагаах арга саам эрэлхийлж ажиллах нь харагдах. Эхний үе шатанд эдийн засагт үүссэн хүндрэлийг богино хугацаанд тогтворжуулж, макро эдийн засгийн тэнцвэрийг хангах. Эдийн засгийн бүтцийг төрөлжүүлж, түүхий эдийн үнээс хамааралт байдлыг аажмаар бууруулах, төлбөрийн тэнцлийн эрсдэлийг багасгах, өрийн дарамтыг зохистой арга хэлбэрээр зөөлрүүлж, эдийн засгийн дархлааг сайжруулах бодлого хэрэгжүүлэх аж.Хоёрдугаар үе шатанд тогтворжиж байгаа макро эдийн засгийн орчныг улам бэхжүүлэх, цаашдын тогтвортой өсөлтийн суурийг хангаж, эдийн засгийн эрчимжүүлэх, үйл ажиллагааны хөтөлбөрийг хэрэгжүүлэхэд шаардлагатай хөрөнгө санхүүгийн эх үүсвэрийг бүрдүүлж, тавьсан зорилтоо бүрэн хэрэгжүүлэх таатай орчин нөхцөлийг бүрдүүлэх бодлого хэрэгжүүлэхээ Ерөнхий сайд Ж.Эрдэнэбат хэлсэн.

Гэхдээ тэгээд засгийн бодлого яригдаж эхлэв үү, үгүй юу чамгүй асуудал дагаад яригдсан. Цаашид ч яригдах янзтай. Монголчууд “Морьдохын хазгай” гэж зүгээр ч нэг хэлж ярьж ирээгүй байх.

Эх сурвалж: Б.Итгэл, Шуурхай.мн