Чуулганаар Эрүүгийн хэрэг хянан шийдвэрлэх тухай хууль, Хууль сахиулах ажиллагааны тухай хууль, Шүүхийн шийдвэр гүйцэтгэх тухай хууль, Гэр бүлийн хүчирхийлэлтэй тэмцэх тухай хууль зэрэг таван хуулийг буцаах тухай асуудлыг хэлэлцэж баталсан билээ. Хууль зүйн байнгын хорооны дарга хэлэхдээ дээрх хуулиуд ньТөрийн эмхэтгэлд хэвлэн нийтлэгдээгүй, ёсчлон батлагдаагүй тул буцааж байна гэж байсан. Чуулганаас гарсан шийдвэртэй холбоотойгоор Гэр бүлийн хүчирхийлэлтэй тэмцэх тухай хуулийн хэрэгжих хугацааг наашлуулах хэрэгтэй гэдэг асуудал яригдсан. Түүнчлэн МАН-ын зүгээс уг хуулийг яаралтай өргөн барьж, батлуулна гэдгээ мэдэгдсэн. Гэхдээ уг хууль дангаараа хэрэгжлээ гээд  хүлээлт үүсгэсэн зохицуулалт болж дийлэхгүй гэдгийг хэлэх хүмүүс байгаа. За харин ХЭҮК-ын дарга Ж.Бямбацогт хэлэхдээ “Гарцаагүй хэрэгтэй хууль учраас одоо яаралтай буцааж оруулж ирж байгаа нь зөв. Шинээр баталсан ч хэрэгжих хугацаа нь хойшилсон Эрүүгийн хууль, Зөрчлийн хуультай холбоотой заалт нь гэвэл гэр бүлийн хүчирхийллийг гэмт хэрэг гэж үзсэн явдал. Харин одоо хэрэгжиж байгаа хуульд тийм заалт байхгүй учраас шинэ хуульд байгаа заалтуудыг оруулж ирэх байх.” гэж байна.