Риогийн олимпийн наадмын сонгомол бөхийн 85 кг-ын мөнгөн медаль хүртсэн Украины бөх Жан Беленюк өөрийг нь байраар шагнахгүй байгаа төр засагтаа эгдүүцэж буйгаа мэдэгджээ. Eurovision дууны наадамд түрүүлсэн дуучин Жамалд төр засгаас нь байраар шагнасан хэрнээ олимпийн медальтнаа үнэлэхгүй байна гэж тэр хэлсэн байна.

“Сайн тийшээгээ өөрчлөгдөж буй юм огт алга. Хаа сайгүй л амьдрал доройтож, ядуурч байна. Тамирчдын амьдрал ч ялгаагүй. Би бодсноо хэлдэггүй, хэлээ хазаад явдаг хүн биш ээ. Загас шиг дуугүй явж байснаа гэнэтхэн өөр улсын нэр дээрээс барилдаад эхэлдэг тамирчид бий. Тэгвэл би тэгээгүй. Яагаад дуучин Жамалыг гурван өрөө байраар шагнасан хэрнээ тамирчдад болохоор өгдөггүй юм бэ? Жамал олон хүүхэдтэй хүүхэн юм уу?” гэж Беленюк ярьжээ.

Жан Беленюкийн эцэг нь руанда, ээж нь украин бөгөөд өнгөт арьстай залуу ч гэсэн Укрианы нийслэл Киевт төрж өссөн юм. Харин дуучин Жамал нь хүүхэдгүй ганц бие бүсгүй ажээ.

Р.Гэгээ